भांगरभूंय | प्रतिनिधी
सरकाराक ५०० कोटींची येणावळ अपेक्षीत
पणजी : सुदारीत मीन डंप धोरणाक सरकारान मान्यताय दिल्ल्यान खाजगी जमनींतल्या आनी जमीन रूपांतरण शुल्क भरूंक नाशिल्ल्या डंपाची सरकार ई – पावणी करतलें. आता मेरेन सरकारान अशे तरेचे ३० ते ४० डंप सोदून काडिल्ल्यान ई – पावणेंत सादारण ५०० कोटींची येणावळ सरकाराक अपेक्षीत आसा. मुख्यमंत्री डॉ. प्रमोद सावंत हांणी मंत्रिमंडळ बसके उपरांत पत्रकार परिशदेंत ही म्हायती दिली.
डंप धोरणाक सरकारान ह्यान पयलींच मान्यताय दिल्या. आदल्या धोरणांत कांय बदल केल्यात. ते प्रमाण खाजगी जमनींचो दावो करूंक नाशिल्ल्या आनी जमीन रूपांतरण शुल्क भरूंक नाशिल्ल्या डंपाचो सोद घेतले. डंपाच्या लीजधारकांक लीजाचें शुल्क दितले. पारदर्शक पद्दतीन पावणेची प्रक्रिया सुरू जातली. उपरांत ती जमीनूय मेकळी जातली, अशें तांणी सांगलें.
ईएसआय हॉस्पिटलां खातीर नर्स, कारकुना सयत २९ दोतोरांची कंत्राटी तत्वाचेर भरती जातली. तिका मंत्रिमंडळान आयज मान्यताय दिली. खोर्ली भलायकी केंद्रांत केंद्र सरकाराच्या भलायकी आनी कुंटुंब कल्याण मंत्रालया वतीन आधुनीक ग्रामीण भलायकी संशोधन केंद्र स्थापन करतले. हे खातीर ३५० चौमि जमिनीच्या हस्तांतरणाक मान्यताय दिल्या, अशें डाॅ. सावंत हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
