श्रीलंकेंत हुंवाराक लागून ४ जाणांक मरण: जायते लोक बेपत्ता
भांगरभूंय | प्रतिनिधी
कोलंबो, खबरां संस्था: श्रीलंकेंत घोग्यांनी पावस पडटा. पावसाचो फटको बरोच नेटान बशिल्ल्यान लोकांक हुंवाराक तोंड दिवचें पडटा. हुंवाराक लागून आतां मेरेन ४ जाणांक मरण आयलां. हाका लागून जायते जाण बेपत्ता आसात. मरण आयिल्ल्यां मदीं दोन भुरग्यांचोय आसपाव आसा. २ लाखां परस चड लोकांचेर हुंवाराचो परिणाम जाला.
पीटीआयच्या म्हणण्या प्रमाण, कोलंबो विमानतळार देंवपी ६ विमानांक घोग्यांनी पावस आनी वार्याक हाका लागून परत वळोवचीं पडलीं. बंगालच्या उपसागरांत तयार जाल्ल्ळा वादळाक लागून श्रीलंकेंत व्हड प्रमाणांत पावस पडपाक लागला. फाटल्या २४ वरांत ७५ मिमी.परस चड पावस पडला.
सेगीत पावस जरी पडलो तरी उच्च दाबाचो वाठार तिगून आसा. तशेंच देशभर खर वारें व्हांवता. हवामान खात्यान दिल्ले म्हायती प्रमाण पावस ल्हव ल्हव उत्तर-पश्चीम दिकेन वता आनी फुडाराक चक्रीवादळांत हाचें रुपांतरीत जावंक शकता.
मदती खातीर सैन्य तैनात
श्रीलंका सरकारान हुंवाराक तोंड दिवपा खातीर आनी लोकांक भायर काडपा खातीर सैन्य आनी नौदळाची नेमणूक केल्या. हुंवाराच्या पिडेस्तांक लश्करी जवान जेवण आनी हेर गरजेच्यो वस्तू दितात.
दुसरे वटेन मंगळारा अम्पारा जिल्ह्यांत बेपत्ता जाल्ल्या ६ विद्यार्थ्यां मदल्या २ विद्यार्थ्यांच्यो कुडी पुलिसांक सांपडल्यात. बेपत्ता जाल्ल्या विद्यार्थ्यांची पिराय १२ ते १६ वर्सां मजगतीं आशिल्ली. ते प्रवास करताले ती ट्रॅक्टर-ट्रॉली हुंवाराच्या उदकान व्हांवून गेल्ली. मात ट्रॅक्टर चालका सयत हेर ५ विद्यार्थी वाटावले आनी दोगांक मरण आयलें. तशेंच पावसाक लागून हांगच्या दोंगराळ वाठारांनी रेल्वे सेवा बंद दवरल्या.
मजगतीं, श्रीलंकेच्या आपत्ती वेवस्थापन केंद्राच्या म्हणण्या प्रमाण, हुंवाराक लागून ३ हजार कुटुंबांतल्या १० हजारां परस चड लोकांक आपलें घर सोडचें पडलें. तांकां १०४ मदत घरांत दवरलां. नॅशनल बिल्डिंग रिसर्च इन्स्टिट्यूटान (NBRI) देशांतल्या ९ प्रांतांनी पालसणां कोसळपाची शिटकावणी दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
