भांगरभूंय | प्रतिनिधी
नवी दिल्ली, खबरां संस्था: ‘धर्मांतरणाचो उद्देश फकत आरक्षणाचो लाव मेळोवपा पुरतो आसल्यार, ताका परवानगी दिवपाक मेळची ना. कारण हाका लागून समाजीक नदरेन मागाशिल्ल्या समुदायांक आरक्षण दिवपाचो उद्देश अपेशी जातलो.’ अशे निरीक्षण सर्वोच्च न्यायालयान एका खटल्याची सुनावणी करतान नोंद केलें. ह्या वेळार न्यायालयान ह्या सगळ्या प्रकरणा वेल्यान याचिका करपी बायलेक सोलून काडली. तशेंच पुद्दुचेरीतले बायलेन दाखल केल्ली याचिका जातूंत तिणें नोकरेंत अनुसूचीत जातींक मेळपी आरक्षणाचो लाभ मागिल्लो.
बार अँड बेंचच्या खबरां प्रमाण, खटल्याचे सुनावणे मजगतीं न्यायमूर्ती पंकज मिथल आनी आर. महादेवन हांच्या खंडपीठान म्हणलें, क्रिस्तांव धर्म पाळपी लोक हिंदू आशिल्ल्याचें सांगून अनुसूचीत जातींक मेळपी आरक्षणाचो लाव घेवपाक शकनात. ह्या प्रकरणांत बायलेन अनुसूचीत जातींक मेळपी आरक्षणाचो लाव मेळचे खातीर याचिका दाखल केल्ली.
खंडपीठान कितें म्हणलें?
न्यायमूर्ती मिथल आनी न्यायमूर्ती महादेवन हांच्या खंडपीठान म्हणलें, धर्मांतराचो उद्देश फकत आरक्षणाचो लाव मेळोवपा खातीर आसल्यार ताका मान्यताय दिवपाक मेळची ना. कारण हाका लागून समाजीक नदरेन मागासलेल्या समुदायांक आरक्षण दिवपाचो उद्देशूच अपेशी जातलो. जर धर्मांतराचो उद्देश मुखेलपणान आरक्षणाचो लाव मेळोवप आसतलो आनी दुसर्या धर्माचेर खरी श्रद्धा नासल्यार ताका परवानगी दिवपाक शकना. अपील करपी बायलेक अनुसूचित जातीचें आरक्षण दिवप, जी धर्मान क्रिस्तांव आसा, मात नोकरेंत आरक्षणाचो लाव मेळपाच्या हेतान ती हिंदू धर्म स्वीकारिल्ल्याचो दावो करता, हें आरक्षणाच्या मूळ उद्देशाच्या आड आसतलें आनी ताका लागून हाका मान्यताय दिली जाल्यार संविधाना कडेन फटींगपणां जातलीं.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
