भांगरभूंय | प्रतिनिधी
कायद्याच्या उल्लंघनांक लागून दोन स्टोलांचेर कारवाय
पणजीः बाल भवन पणजे चलपी मीना बाजार ह्या प्रदर्शनांत धाड घालून कायद्याचें उल्लंघन करपी दोन स्टोलांचेर कारवाय केली. पयलीं कसलीच परवानगी घेनासतना आनी आयोजकांचे तपशील घेनासतना हें प्रदर्शन बाल भवनांत चालीक लायलां अशी कागाळ गोवा कॅन हे एनजीओन खात्या कडेन केल्ली.
बाल भवनांत मीना बाजार हें खाद्य पदार्थाचें विक्री प्रदर्शन चालू आसा. बुधवारा गोवा कॅन हांच्या कागाळीची दखल घेवन मेसर्स राजस्थान फुड्स हांच्या स्टोलांचेर चवकशी केली आनी थंयसर पॅकेज्ड कोमोडीटी कायदो 2011 प्रमाण सक्तिचे प्रतिज्ञा घेवंक नाशिल्ले 85 पापडाची पॅकेटां जप्त केलीं. तशेंच मेसर्स ओडिशा होम पिकल्स हांचो सत्यापीत नाशिल्लो इलेक्ट्रोनीक वजन माक्नय जप्त केलें. प्रदर्शनांत दवरिल्ल्या लोणच्याच्या पाकिटांचेर तयार केल्ली तारीख आनी ते पेड्ड्यार जावपी तारीख नमूद करुंक नासली अशें गोवा कॅनान दाखोवन दिलें. वजन माप खात्याचे निरिक्षक विकास खानोळकार हांणी ही कारवाय केली.
भुरग्यां खातीरची नामनेची संस्था बाल भवनाचो वेवसायीक गजालीं खातीर वापर करून ताचे नांव पाड करप ही एक हुस्क्याची गजाल आसा. ह्या सारकिल्ले गिरायक हक्क उल्लंघनाचे प्रकार बाल भवनांत भेट दिवपी भुरग्यांचे नकारात्मक परिणाम घडोवन हाडटले, अशी कागाळ करपी गोवा कॅनचे रोनल्ड मार्टीन्स हांणी सांगलें.
आयोजकांचे तपशील तपासी नासतना ह्या वेवसायीक प्रदर्शना खातीर परवानगी दिवपी शिक्षण खात्याच्या अधिकाऱ्यांची चवकशी करची. मीना बाजारच्या आयोजकांनी आपले नांव, पत्तो आनी मोबायल नंबर गुपीत दवरिल्ले. तशेच येवकार कक्षां कडेन गिरायकां खातीर कागाळ करपा खातीर कादेन लेगीत नासलो. एफएसएसआय नेमा नुसार भायल्या राज्यांतले अन्न वेवसाय करप्यांनी आपले नांव आनी पत्तो दिवप सक्तीचें अशें मार्टीन्स हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
