भांगरभूंय | प्रतिनिधी
पणजीः अंदूंच्या 55व्या भारतीय अंतरराष्ट्रीय चित्रपट महोत्सवांत वांटेकार जावपी लोकांक विंगड विंगड मनरिजवण आनी सांस्कृतीक कार्यावळींच्यो सुरबूस आस्वाद घेवपाक मेळ्ळो. हे फावटी 9 राज्यांतल्या 110 कलाकारांनी आपली आगळी वेगळी लोककला ह्या वेळार सादर केली.
गुवाहाटी, हैदराबाद, भुवनेश्वर, जम्मू, चेन्नय, हिमाचल प्रदेश, बेंगळुरू, पुणें, दिल्ली ह्या शारांनी सीबीसीच्या वेगर्ळयावेगळ्या प्रादेशीक कार्यालयांनी आपल्या राज्यांतलीं वेगळींवेगळीं लोक आनी शास्त्रीय नृत्य प्रकार इफ्फी 2024 त वेगळ्यावेगळ्या सुवातींनी दाखोवन आपल्या देशाची परंपरा आनी कलेचे दायज मनयलें.
दरेक नाचाचो प्रकार एक आगळीच काणी सांगतलो आनी आपल्या वाठारांतल्या थळाव्या रिती, संस्कार आनी अध्यात्माचें दर्शन घडोवन हाडलें. देखून इफ्फींतल्या चित्रपट मोगीं खातीर हो एक अदभूत आनी कलात्मक अणभव आसलो.
सीबीसी गुवाहाटीन आसामांतले सत्रीय, भोरताल, देवधानी आनी बिहू नाच सादर केलो, सीबीसी हैदराबाद हांणी तेलंगाणाचो गुसाडी नाच, सीबीसी भुवनेश्वर हांणी ओडिशा थावन ओडिसी, सीबीसी जम्मू प्रदेशान काश्मीरांतले राऊफ, सीबीसी चेन्नय हांणी तमिळनाडूंतलो कर्कत्तम, सीबीसी केरळ हांणी केरळांतल्यान मोहिनियाट्टम, सीबीसी हिमाचल हांणी हिमाचल प्रदेशांतल्यान शिरमोर नाटी, दग्याली आनी डीप नाच, सीबीसी बेंगळुरू हांणी कर्नाटकांतलो जोगाथी आनी दीपम नाच, सीबीसी पुणें हांणी महाराष्ट्रांतली लावणी आनी मुजरा, सीबीसी दिल्ली हांणी राजस्थानांतलो चेरी आनी कालबेलिया नाच आनी बिहारांतल्यान झिझिया नाच सादर केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
