भांगरभूंय | प्रतिनिधी
शर्मिला टागोरः दिग्दर्शक तपन सिन्हा हांचे कारकिर्दीचेर पॅनल चर्चा
भांगरभूंय । प्रतिनिधी
पणजीः एकादी नवी गजाल शिकचे खातीर पयलीं बरो आयकुपी आसप गरजेचें आसा. दिग्दर्शक तपन सिन्हा हांचे कडेन दुसऱ्यांचे आयकून घेवपाची कला आशिल्ली, अशें मत ज्येश्ठ अभिनेत्री शर्मिला टागोर हांणी उक्तायलें. बुधवारा इफ्फींत जाल्ले दिग्दर्शक तपन सिन्हा हांचे कारकिर्दी विशीं जाल्ले पॅनल चर्चेंत ती उलयताली. ह्या वेळार एम मनू चक्रवर्ती, अर्जून चक्रवर्ती, रत्नोत्तम सेनगुप्ता हाजीर आशिल्ले.
टागोर हांणी सांगलें, कांय लोकां कडेन उलोवपा खातीर कांयच आसना. अशे लोक खूब खेपे शांत रावप पसंत करतात. तपन सिन्हा हांचे कडेन उलोवपा सारक्यो खूब गजाली आशिल्ल्यो. पूण ते उलय नाशिल्ले वा तांकां उलोवपाचें नासतालें. तांकां दुसऱ्यांचें आयकून घेवप चड आवडटालें. ही गजाल खूब म्हत्वाची आसा. आपूण खूबश्या कार्यावळींक गेल्या. आयजूय एकादे कार्यावळीक वता थंय दरेकल्याक उलोवपाचें आसता. दरेकलो उलोवपाक उत्सूक आसता. अश्या लोकांक दुसऱ्यांचें आयकून घेवपाचेंच नासता. तुमी ज्या वेळार दुसऱ्याचें आयकना, त्या वेळार तुमची शिकपाची प्रक्रिया बंद जाता.
आपली भयण 5 वर्सां पिरायेची आसतना तिणें तपन सिन्हा हांच्या बंगाली काबुलीवाला चित्रपटांत काम केल्लें. त्या वेळार तिणें सेटाचेर खूब हट्ट केले. सिन्हा हांणी पाशियेसान तिचे लाड पुराय केले. बेजार जायनासतना काम करप हेंवूय तांचें खाशेलपण आशिल्लें. हेच खातीर तांकां खूबश्या कलाकारां कडल्यान बरें काम करून घेवपाक जमलें, अशें टागोर हांणी सांगलें. मनू चक्रवर्ती हांणी सांगलें, तेन्नाच्या चित्रपट समिक्षकांनी तपन सिन्हा हांचेर अन्याय केलो. तांणी त्या वेळा वयले सत्यजीत रे, मृणाल सेन अश्या दिग्गज दिग्दर्शकांकूच म्हत्व दिलें. हे खातीर सिन्हा हांचे कडेन आनी तांच्या कामा कडेन आडनदर जाली. तांणी खूबश्या कलाकारांक संद दिली. उपरांत ते व्हड अभिनेते जाले. सिन्हा हांच्या चित्रपटांत समाजीक संदेश आशिल्लो. तांचे चित्रपट कलात्मक आसले तरीय सामान्य मनशाक समजता अशे आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
