भांगरभूंय | प्रतिनिधी
पणजी : सेंट फ्रान्सीस झेवियराचे पवित्र कुडीचे दर्शन घेवपा खातीर पर्यटक तशेंच देशविदेशांतल्या भाविकांची गर्दी वाडत आसा. अस्तंत बंगालचे राज्यपाल सी. व्ही. आनंद बोस हांणीय दर्शन घेतलें. केरळ विधानसभेच्या शिश्टमंडळा सयत गोंय विद्यापीठाचे कुलगुरू प्रा. हरिलाल मेनन, पाकिस्तानातले भारताचे आदले उच्चायुक्त डॉ. टी. सी. ए. राघवन हांणीय दर्शन घेतलें.
आनंद बोस हे सोमारा गोंयांत पावले. शिश्टाचार मंत्री मॉवीन गुदिन्हो हांचे सयत तांणी पोरणें गोंय चर्चीक भेट दिली. तांचे वांगडा सुवाळो समितीचे आयुक्त संदीप जॅकीस, जिल्लोधिकारी डॉ. स्नेहा गिते हाजीर आशिल्ली. पोरणें गोंय चर्च आनी सेंट फ्रान्सीस झेवीयर शवदर्शन सुवाळो हें गोंयचें दायज जावन आसा. हाका लागून गोंयचें नांव संवसारभर पावलां, अशी उतरां राज्यपाल बोस हांणी काडलीं.
कुलगुरू प्रा. हरिलाल मेनन हांणी लेगीत बुधवारा सेंट फ्रान्सीस झेवीयर हांचे पवित्र कुडीचे दर्शन घेतलें. उपजिल्लोधिकारी विनायक च्यारी हांणी सरकारा वतीन तांकां भेटवस्त भेटयली. केरळ विधानसभा शिश्टमंडळाच्या वांगड्यांनी लेगीत पवित्र कुडीचें दर्शन घेतलें.
गोंयांक भेट दिवन कुडीचें दर्शन घेवप हो एक वेगळोच अणभव आशिल्लो. पयलेच खेपो हांवें दर्शन घेतलें, अशें केरळ विधानसभा शिश्टमंडळाचे वांगडी प्रा. व्ही. पी. जोशीट हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
