भांगरभूंय | प्रतिनिधी
बरेली, खबरां संस्था: उत्तर प्रदेशाच्या बरेली जिल्ह्यांत लग्नाक वचपी एके गाडयेक आयतारा अपघात जालो. गुगल मॅप्साचेर दाखयिल्ल्या रस्त्या वेल्यान वतना व्हड अपघात घडलो. हे विशीं आतां चार बांदकाम अधिकार्यां आड निश्काळजीपणाचो गुन्यांव नोंद केला. तशेंच पुलिसांनी गुगलच्या प्रादेशीक अधिकार्यांकूय हे विशीं जापसालदार धरल्यात. उपरांत गुगलान हे विशीं जाप दिल्या.
प्रकरण कितें?
गुरुग्रामच्यान बरेली जिल्ह्यांत लग्नां खातीर वतना दातागंजाक अपघात जालो. ह्या वेळार गुगल मॅप्सान दाखयिल्ल्या रस्त्यान वतना तांणी रामगंगा न्हंयेवेल्या पुलाची निवड केली. मात हो पूल अर्दोच आशिल्ल्याची कल्पना लेगीत तांकां नाशिल्ली. वाहन वेगात फुडें गेले उपरांत ते सरळ न्हंयेंत कोसळ्ळे आनी तिगांकूय मरण आयलें.
अंदूं वर्साचे सुरवातेक हुंवाराक लागून न्हंयेवेलो पुलाचो भाग व्हावून गेल्लो. तेन्ना सावनूच हो पूल अर्दवट अवस्थेंत आसा. मात गुगल मॅप्सांचेर ते विशींची म्हायती अद्यावत जावंक नाशिल्ली. गुगल मॅप्साचें अनुकरण केल्ल्यान तीग तरणाट्यांक जीव वगडावचो पडलो.
गुगलान कितें जाप दिली?
मजगतीं, गुगलान हे विशीं दिलगिरी उक्तायल्या. गुगलच्या प्रवक्त्यांनी एएफपी वृत्तसंस्थेक धाडिल्ले इमेलींत म्हणलां, जांकां मरण आयलां तांकां आमी आर्गां ओंपतात.आमी संबंदीत यंत्रणे वांगडा समन्वयांतल्यान काम करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
