भांगरभूंय | प्रतिनिधी
पणजीः म्हापश्यां एका बिल्डरान ताच्या भागधारकांक तोपी घाल्ल्यान गोंय रिअल इस्टेंट नियामक प्राधिकरणांन तांकां दंड दिला. पूण दंडाची थोडीच रक्कम ताणें फारीक केल्या. उरिल्ली रक्कम भरपाक तो फाटीं सरता. जिल्लोधिकार्यान हो आदेश चालीक लावंक जाय. पूण ताका अटक करची सोडून ताका परत परत कारणां दाखयात नोटीस काडटात, असो आरोप भागधारकांनी केला. आठ दिसां भितर ताचेर कारवाय जावंक ना जाल्यार जिल्लोधिकार्याच्या कार्यालया मुखार धरणें धरपाची शिटकावणी भागधारकांनी दिल्या.
ह्या बिल्डरा आड कसली कारवाय केल्या हाची जाप विचारपा खातीर म्हापशेंचे इमारतीच्या भागधारकांनी जिल्लोधिकार्याची भेट घेतली. उपरांत उलयतना भागधारक जितेश कामत हांणी सांगलें, भेट घेवपाक आयिल्ले सगळे म्हापशेंच्या प्रभु चेंबर हे वादग्रस्त इमारतीचे भागधारक. ही इमारत बाबत जाल्ल्या कारणान आमी बिल्डरांक ज्यो त्रुटी आसात त्यो सुदारपाची मागणी केल्ली.
पूण बिल्डरान ती मागणी पुराय करुंक नाशिल्ल्यान आमकां ‘रेरा’कडेन वच्चें पडलें. रेरान आमचे वटेन आदेश काडून बिल्डरांक व्याजाची रक्कम धरून ११ कोटींचो दंड घालो. तातुंतलो ५० लाख दंड हो प्रकल्प नोंद करुंक नाशिल्ल्यान सरकाराक फारीक कर म्हणलां आनी उरिल्ली रक्कम भागधारकांक दी म्हूण सांगलां. मात आतां मेरेन ह्या बिल्डरान फकत ३.५० कोटी लुकसाण भरपाय आमकां दिल्या आनी रेरांक ५० लाखांचो दंड भरूंक ना. हे विशीं जिल्लो सत्र न्यायालयान ताका अटक वाॅरंट काडिल्लो आनी ताणें हे विशी सद्या उच्च न्यायालयांत आव्हान दिलां, अशें जितेश हांणी सांगलें
जी लुकसाण भरपाय थकल्या ती जिल्लोधिकार्यां वरवीं वसुल जावपाक जाय. देड वर्स जालें आमी मामलेदारा वरवीं हाची फाटपुरवण करीत आसात. हे विशीं जिल्लोधिकार्यान बिल्डरांक कारणां दाखयात नोटीस काडिल्ली, मात ताणें ताका जाप दिवंक ना. ताका अटक करचे सोडून परत तांकां दुसरी नोटीस काडली, असो आरोप कामत हांणी केलो.
चवथीच्या काळांत आमी परत जिल्लोधिकार्यांक मेळ्ळे आनी आठ दिसां भितर कारवाय करतले अशें आश्वासन दिल्लें. मात आतां चवथ जावन दिवाळी जाली तरी कसल्योच हालचाली जावंक नात. मदीं कूड प्रदर्शनांत व्यस्त आसली म्हण आमी आयज तिका जाप विचारपाक आयिल्ले. तिणें सांगलां फुडले आठ दीस बिल्डरांक प्रत्यक्षांत आफयता आनी सैमीक न्याया प्रमाण फुडली प्रक्रीया चालीक लायतां. जर तो आयकना जाल्यार फुडली कारवाय करपाचें आस्वासन जिल्लोधिकार्यान दिलां, अशी म्हायती कामत हांणी दिली.
जिल्लोधिकार्यान आयज दिल्लें हें आस्वासन, निमणें आस्वासन अशें आमी मानून चलतात. जर तें पुराय जावंक ना जाल्यार आमी जिल्लोधिकार्याचे कचेरे फुडल्यान धरणें धरतले, अशी शिटकावणी कामत हांणी दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
