भांगरभूंय | प्रतिनिधी
पणजी ः विद्या प्रबोधिनी म्हाविद्यालयान एनएएसीच्या (नॅशनल अस्सेसमेंट अँड अॅक्रेडिटेशन कौन्सिल) दुसऱ्या वेळार जाल्ल्या मुल्यांकनांत A+ ग्रेड मेळयली. नॅकच्या वतीन पंगडान शिक्षणीक प्रगती वांगडाच म्हाविद्यालयाच्या समाजीक आनी पर्यावरणीय योगदानाची खासा तोखणाय केल्या. हाचे वेल्यान विद्या प्रबोधिनी महाविद्यालयाच्या शिक्षणीक उत्कृश्टतायेची, विद्यार्थ्यांची उदरगत आनी गुणवत्ता वाडोवपाच्या सातत्यान केल्ले यत्न सिद्ध जाता.
नॅक A+ ग्रेड ही भारतांतल्या उच्च शिक्षण संस्थां खातीर एक उंचेलो भोवमान आसा आनी तो शिकोवपाचे पद्दतीतली उत्कृश्टता, संशोधन, नवनिर्माण, समुदाय वांटो आनी मुळाव्या साधनसुविधांतली प्रभावी कामगिरीचे प्रतीक आसा.
हें फकत म्हाविद्यालयाच्या समर्पीत प्राध्यापक वर्ग, प्रेरीत विद्यार्थी, सक्षम वेवस्थापन आनी पालक-शिक्षक पंगडाच्या सामुहीक यत्नांक लागून शक्य जाला. तशेंच म्हाविद्यालयाच्या अंतर्गत गुणवत्ता आश्वासन कक्ष (IQAC), थळावी वेवस्थापन समिती, आनी सल्लागार समितीचोय म्हत्वाचो वांटो आसा. विद्या प्रबोधिनी म्हाविद्यालय शिक्षणीक आनी अभ्यासक्रमाच्या मळार नवनिर्माणा खातीर यत्न करतलें आनी शिक्षणाच्या मळार नवे मापदंड निश्चित करतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
