भांगरभूंय | प्रतिनिधी
नवी दिल्ली, खबरां संस्था: वेंचणूक हारले उपरांतूच इलेक्ट्रॉनीक मतदान यंत्रांनी (ईव्हीएम) इबाड जाल्ल्याचो मुद्दो हाजीर करतात, अशें खर निरीक्षण नोंद करून, सर्वोच्च न्यायालयान देशांतल्या वेंचणुकां खातीर मतपत्रिकांचो वापर करपाची मागणी करपी याचिका मंगळारा भायर मारली. के. ए. पॉल हांणी दाखल केल्ली याचिका भायर मारतना, ‘‘जेन्ना तुमी वेंचणूक जिखतात तेन्ना ईव्हीएमांत कसलेच तरेचो इबाड नासता. तुमी हारतात तेन्ना ताचे भितर इबाड जाल्लो आसता.’’ अशी टिप्पणी न्या. विक्रम नाथ आनी न्या. पी बी वराळे हांच्या खंडपीठान केली.
मतदारांक आकर्शीत करपा खातीर पयशे, सोरो आनी हेर वस्तू वांटिल्ले खातीर दोशी थारिल्ल्या उमेदवारांचेर पांच वर्सां खातीर अपात्र थारपा विशीं वेंचणूक आयोगाक निर्देश दिवचे अशी मागणी याचिकाकर्त्यांनी केल्ली.
‘‘असल्यो कल्पना तुमकां कश्यो सुचल्यो?’’ असो प्रस्न खंडपिठान विचारलो. आपूण एका संस्थेचे अध्यक्ष आशिल्ल्यान हे संस्थेन तीन लाख अनाथ आनी ४० लाख विधवांक सांबाळ्ळ्यांत अशें याचिकादारान सांगलें. ताचेर तुमी ह्या राजकी मळार कित्याक पडटात? तुमच्या कामाचें क्षेत्र सामकें भिन्न आसा अशें खंडपीठान तांकां सांगलें.
लोकसभा वेंचणुके उपरांत, वेंचणूक आयोगान जून २०२४ त जाहीर केल्ले प्रमाण णव हजार कोटी रुपयांची रक्कम जप्त केल्ल्याची म्हायती दिल्ली अशें पॉल हांणी न्यायालयाक सांगलें. ताचेर मतपत्रिकांचो वापर केल्ल्यान भ्रश्टाचार जावचो ना? असो प्रस्न न्यायालयान विचारलो.
टेस्लाचे संस्थापक एलॉन मस्क, आंध्र प्रदेशचे मुख्यमंत्री चंद्राबाबू नायडू, आंध्र प्रदेशचे आदले मुख्यमंत्री वाय एस जगन मोहन रेड्डी हांणीय ह्यान पयलीं ईव्हीएमचेर दुबाव उक्तायल्लो, अशें पॉल हांणी म्हणलें. मात न्यायालयान हो मुद्दो विचारांत घेवपाक न्हयकार दिलो. ह्यान पयलीं एप्रिलांत मतदान मतपत्रिकेचेर घेवचें अशी मागणी करपी याचिका सर्वोच्च न्यायालयान भायर मारिल्ल्यो. मतदान यंत्रांत घोटाळो करपाचो दुबाव निराधार आशिल्ल्याचें न्यायालयान तेन्ना म्हणिल्लें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
