भांगरभूंय | प्रतिनिधी
धर्मानंद कामत हांकां सर्गेस्त चंद्रकांत केणी पुरस्कार भेटयलो
पणजी : संस्कृतायेचो सांबाळ करपा खातीर भास तिगाेवन दवरपाची गरज आसा. सर्गेस्त चंद्रकांत केणी हांणी पत्रकारिता तशेंच चळवळीच्या माध्यमान भास तिगोवन दवरली. पत्रकारिता, साहित्य हातूंत वावर करतना तांणी गोंयची संस्कृताय तिगोवन दवरपाक मोलादीक वावर केलो. आयज गोंयकारपण तिगोवन दवरपाची गरज आसा, अशें आदले केंद्रीय मंत्री सुरेश प्रभू हांणी सांगलें.
पणजे सरस्वती मंदीर सभाघरांत सर्गेस्त चंद्रकांत केणी पुरस्कार भटोवपाची कार्यावळ जाली. आदले केंद्रीय मंत्री सुरेश प्रभू हांचे हस्तुकीं धर्मानंद कामत हांकां हो पुरस्कार भेटयलो. ह्या वेळार सुरेश वाळवे, अनील पै आनी प्रुडंट मिडियाचे संपादक संचालक प्रमोद आचार्य माचयेर हाजीर आशिल्ले.
चंद्रकांत केणी हांचे कडेन म्हजे लागींचे संबंध आशिल्ले. उणी साधना आसतना लेगीत तांणी मोठो वावर केलो, अशा उतरांनी तांणी चंद्रकांत केणी हांच्या वावराचो भोवमान केलो.
हेर माध्यमांचे तुळेन दिसाळ्यांची विश्वासाहर्ता कायम आसा. घटणे फाटलें सत्य जाणून घेवपा खातीर लोक आयज लेगीत दिसाळ्यांचो आदार घेतात. भाशीक दिसाळ्यांचो खप वाडत आसा. चंद्रकांत केणी हांच्या राष्ट्रमता खातीर लेगीत दिल्लीत हांवें बातमीदारी केल्या, अशें पुरस्कार स्विकारले उपरांत उलयतना धर्मानंद कामत हांणी सांगलें.
सर्गेस्त चंद्रकांत केणी हांणी राज्या खातीर व्हड योगदान दिलां. तांच्या नांवाचो रस्तो मडगांवां जायना, ही दुर्दैवी गजाल आसा अशें सुरेश वाळवे हांणी सांगलें.
अनील पै हांणी येवकाराचें उलोवप केलें. प्रुडंट मिडियाचे संपादक संचालक प्रमोद आचार्य हांणी उपकार मानले. चंद्रकांत केणी पत्रकारिता पुरस्कार हो वर्सागणीक व्हड जावपाक जाय. आयज आमी कोंकणी, मराठी रोमी लिपीतल्यान बरयतात. फुडाराक किदें स्थिती जातली, हाचो विचार करपाक जाय अशें प्रमोद आचार्य हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
