भांगरभूंय | प्रतिनिधी
एक देश, एक वेंचणूक आनी समान नागरी कायद्याची देश पांवड्याचेर कार्यवाही जावपाची गरज
भांगरभूंय । प्रतिनिधी
पणजी : दर एकलो हक्कां विशीं जागरूक आसता. घटनेन हक्कां सयत काय कर्तव्यां नागरिकांचेर घाल्या. दर एकल्यान हक्कां सयत कर्तव्यांक पालव दिलो जाल्यारूच घटनेची प्रभावी कार्यवाय शक्य आसा. समान नागरी कायदो तशेंच एक देश, एक वेंचणुकेची कार्यवाय जावपाची गरज आसा, अशें मुख्यमंत्री डॉ. प्रमोद सावंत हांणी सांगलें.
गोंय विद्यापीठात घटनेच्या 75 व्या वर्सा निमतान कार्यावळ आयोजीत केल्ली. हे कार्यावळीक मुखेल सोयरे म्हूण मुख्यमंत्री उलयताले. कायदो मंत्री आलेक्स सिक्वेरा, विरोधी पक्ष फुडारी युरी आलेमाव, अॅडव्होकेट जनरल देवीदास पांगम, मुखेल सचीव डॉ. व्ही. कांडावेलू, गोंय विद्यापीठाचे कुलगुरू प्रा. हरिलाल मेनन, निवृत्त न्यायाधीश सिद्धार्थ मृदुल कार्यावळीक हाजीर आशिल्लें.
समान नागरी कायदो सगळ्यांत पयली गोंयांत लागू जालो. गोंयातल्या सर्वधर्म समभावाची सगळे जाण तोखणाय करतात. गोंय हे सगळ्याच बाबतीत आदर्श राज्य आसा. भारत देश स्वतंत्र जालो तेन्ना पाकिस्तानाची निर्मिती जाली. कालांतरान बांगलादेशाची निर्मिती जाली. पाकिस्तान आनी बांगलादेशांत जशें अराजकतेचे वातावरण आसा तशें भारतात ना. भारतात घटनेप्रमाण लोकशाय चलता. घटनेन जे हक्क आनी कर्तव्या दिल्या ताची जाण सगळ्यांनी दवरपाक जाय. देशाच्या स्वातंत्र्याक 75 वर्सां जाली तरी लेगीत दादलो आनी बायल हांचे समानताये खातीर झगडचे पडटा. दादलो आनी बायल हांचे मदी समानताय हाडपा खातीर प्रधानमंत्री नरेंद्र मोदी हांणी बायलां खातीर 33 टक्के राखीवतेचे विधेयक हाडले. उदक, रस्ते, वीज ह्यो सुविधा काय कडेन आजून पावंक ना. घटनेक पालव दिवन देशाच्या उदरगती खातीर डिजीटल इंडिया, स्टार्ट अप इंडिया, स्वच्छता अभियान मोहीम प्रधानमंत्र्यांनी राबयली. विकसित भारताचे सपन पुराय जावपा खातीर दरेकी भारतीयाचे योगदान म्हत्वाचे आसा, अशें मुख्यमंत्री डॉ. प्रमोद सावंत हांणी सांगलें.
ह्या वेळार मणिपूर उच्च न्यायालयाचे निवृत्त मुखेल न्यायाधीश सिद्धार्थ मृदुल हांचे मुखेल भाशण जालें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
