भांगरभूंय | प्रतिनिधी
मुंबय, खबरां संस्था ः रश्मी शुक्ल हांची महाराष्ट्राची पुलीस महासंचालक म्हणून परतून नेमणूक केल्या. संजय कुमार वर्मा हांचे कडल्यान शुक्ल पद स्वीकारतली. तांणी सोमारा देवेंद्र फडणवीस हांची भेट घेतली. आयज शुक्ल महासंचालक पदाचो ताबो घेतली.
काँग्रेसीन विधानसभा वेंचणुके वेळार तांचे आड कागाळी दाखल केल्ल्यो. काँग्रेसचे प्रदेशाध्यक्ष नाना पाटोले हांच्या मागणे उपरांत वेंचणुके आदीं वेंचणूक आयोगाच्या सुचोवण्यां प्रमाण डीजीपी रश्मी शुक्ल हांकां पदा वयल्यान काडिल्ली. तांचे सुवातेर वरिश्ठ आयपीएस अधिकारी संजय कुमार वर्मा हांणी डीजीपी म्हणून काम सांबाळ्ळें.
रश्मी हांचेर कितें आरोप आसात?
महाविकास आघाडी सरकाराच्या काळांत 2019 वर्सा राज्याच्या गुप्तचर खात्याचे आयुक्त आसतना शुक्ल हांणी शिवसेनेचे फुडारी संजय राऊत आनी एकनाथ खडसे हांचे फोन टॅप केल्ले असो आरोप आसा. 6 मार्च 2021 दिसा कुलाबा पुलीस स्टेशनांत शुक्ला आड गुन्यांव नोंद केल्लो. 2016-17 वर्सा पुण्याचे पुलीस आयुक्त आसतना शुक्ल हांणी नाना पाटोले हांचो फोन अमजद खान ह्या ड्रग्स माफियाच्या नांवान टॅप केल्लो. ही घडणूक उजवाडाक आयले उपरांत फेब्रुवारी 2022 वर्सा पुणेच्या बंडगार्डन पुलीस स्टेशनांत गुन्यांव नोंद केल्लो.
रश्मी शुक्ल कोण?
रश्मी शुक्ल ही 1988 बॅचाची महाराष्ट्र कॅडराची आयपीएस अधिकारी आसा. तांणी केंद्रीय राखीव पुलीस दळाची अतिरिक्त महासंचालक म्हणूनय काम केलां. राज्यांत पुलीस महासंचालक म्हणून नेमणूक जाल्ली ती पयली बायल. ती कांय काळ पुण्याची पुलीस आयुक्त आशिल्ली. तिणें राज्य गुप्तचर फांट्याचे संचालक पदाचेरूय काम केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
