भांगरभूंय | प्रतिनिधी
मुंबय, खबरां संस्था: महाराष्ट्राचे मुख्यमंत्री एकनाथ शिंदे हांणी पदाचो राजीनामो दिला. उपमुख्यमंत्री देवेंद्र फडणवीस आनी उपमुख्यमंत्री अजित पवार हांचे हाजेरींत राज्यपाल सी. पी. राधाकृष्णन हांचे कडेन शिंदे हांणी आयज राजिनामो दिलो. सोपूत विधी मेरेन मुख्यमंत्री म्हणून काम पळोवपाची राज्यपाल राधाकृष्णन हांणी शिंदे हांकां सुचोवणी केली.
महाराष्ट्र विधानसभेचो कार्यकाळ आयज सोंपिल्ल्यान शिंदे हांणी राजीनामो दिलो. मुख्यमंत्र्यांचो राजीनामो म्हळ्यार पुराय मंत्रिमंडळाचो राजीनामो आसता. ताका लागून मुख्यमंत्र्यांनी राजिनामो दिले उपरांत सगळ्या मंत्रीमंडळाचो राजिनामो मानतात.
मजगतीं, महाराष्ट्र विधानसभा वेंचणूक निकाल जाहीर जाला. मतदारांनी भाजप, शिवसेना आनी राष्ट्रवादी हांचे महायुतीक एकतर्फी भोवमत दिलां. महायुतीन २३६ जाग्यांचेर जैत मेळयलें. विधानसभेच्या निकाला उपरांत आतां मुख्यमंत्री कोण जातलो? हे विशीं चर्चा रंगल्या. हे मजगतीं भाजपच्या केंद्रीय नेतृत्वान देवेंद्र फडणवीस हांचें नांव मुख्यमंत्रिपदा खातीर निश्चीत केल्ल्याचें सुत्रांनी कळयलां.
३० जून २०२२ दिसा घेतिल्लो सोपूत
शिवसेना पक्षांतले इतिहासीक फुटी उपरांत एकनाथ शिंदे हे शिवसेनेच्या ४० आमदारांक वांगडा घेवन सत्तेत आयिल्ले. २० जूनाक विधान परिषदेची वेंचणूक जाले उपरांत शिंदे नॉट रिचेबल जाल्ले. विधानसभेंतल्यान ठाणे, उपरांत सुरत, मागीर गुवाहाटी असो प्रवास करीत ते मुंबय परतल्ले. उपरांत तांकां उपमुख्यमंत्रीपद मेळटलें अशी चर्चा सुरु आसतना महायुतीन एकनाथ शिंदे हांकां अचकीत मुख्यमंत्रीपदार बसोवन सगळ्यांकूच धक्को दिलो. एकनाथ शिंदे हांणी ३० जून २०२२ दिसा मुख्यमंत्रिपदाचो सोपूत घेतिल्लो.
एकनाथ शिंदे हांणी कितें म्हणलें?
महायुतीच्या जैता उपरांत राज्यांत परत आपलें सरकार स्थापन जातलें. महायुती म्हणून एकठांय येवन वेचणूक लढयली आनी आजूनय एकठांय आसा. म्हजेवेल्या मोगा खातीर कांय जाणांनी एकठांय येवपाचें, मुंबयत येवपाचें आवाहन केलां. तुमच्या या मोगा खातीर आपूण ऋणी आसा. मात अशे तरेन म्हज्या समर्थनाक कोणेंच एकठांय येवचें न्हय. आपलें एकूच मागणें आसा, शिवसेनेच्या कार्यकर्त्यांनी घरा वा हेर खंयच एकठांय येवचें न्हय. समर्थ आनी समृद्ध महाराष्ट्रा खातीर महायुती घटमूट जाता आनी ह्यान फुडेंय तशीच उरतली, अशें ट्विट एकनाथ शिंदे हांणी केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
