भांगरभूंय | प्रतिनिधी
पणजी ः गोवन वार्ताच्या ‘हुप्पा हुय्या 2024’ बाल विशेशांक आयोजीत राज्य पांवड्यावेली शालेय चित्रकला सर्तीचो (यत्ता पयली ते चवथी) इनामा वांटप सुवाळो आयज मंगळारा 26 नोव्हेंबराक दनपारां 3.30 वरांचेर पणजेच्या इन्स्टिट्यूट मिनेझिस ब्रागांझाच्या मिनी सभघरांत जातलो. ह्या वेळार मुख्यमंत्री डॉ. प्रमोद सावंत, राज्य वेंचणूक आयुक्त दौलत हवालदार, शिक्षण संचालक शैलेश झिंगडे आनी हेर मानेस्त हाजीर आसतले.
हे सर्तींत म्हापशेंच्या जी. एस. आमोणकर विद्यामंदिराचो विराज जाधव हाका पयलो क्रमांक मेळ्ळा. कुंभारवाडो-शिरवय, केपें सरकारी मुळाव्या शाळेचो नीरज पाटील हाका दुसरो जाल्यार विद्याभुवन कोंकणी शाळा, मडगांवच्या अवनी नायक हाका तिसरो क्रमांक मेळ्ळा.
ते भायर बारा तालुक्यांतल्या बारा विद्यार्थ्यांक उमेद वाडोवपी इनामां दितले. तांतूत पेडणें – दीपल राऊळ (हुतात्मा मनोहर पेडणेकर सरकारी उच्च प्राथमीक शाळा, पेडणें), बार्देश- विशांत मांजरेकार (श्रीराम विद्यामंदिर, कोलवाळ), तिसवाडी- प्रणया नार्वेकार (के. बी. हेडगेवार, प्राथमीक शाळा, कुजीरा), दिवचल- सान्वी वाघुर्मेकार (सरकारी प्राथमीक शाळा, डिंगणे- सुर्ला), सत्तरी- साहस गावस (युनिटी प्राथमीक शाळा, वाळपय), फोंडें- पूर्व गांवकार (डॉ. सखाराम गुडे प्राथमिक शाळा, वजनगाळ- शिरोड्यां), साश्टी – आलिया गांवकार (सेंट अॅनीस स्कूल, मडगांव), मुरगांव – परी कुमारी (सरकारी उच्च प्राथमिक स्कूल, सत्रांत-कुठ्ठाळी), सांगें – निहाल नीळकंठ गांवकार (सरकारी प्राथमिक शाळा, केंद्रा – सांगें), केपें- शौर्य एस. गांवकार (टिनी टोट्स प्राथमिक शाळा, केपें), धारबांदोड्यां- वंश बी. बंदिवाडर (सरकारी प्राथमिक शाळा, गावठण-पिळये), काणकोण- वरद दिलीप सुदीर (सरकारी प्राथमिक शाळा, लोलये) हांचो आस्पाव आसा.
परिक्षकांनी शिफारस केल्ल्या विद्यार्थ्यां मदीं अदिती नेने- सरकारी प्राथमिक शाळा, सोनाळ- वाळपय, सिद्धार्थ होमखंडे – मुष्टिफंड संस्था, श्री महालक्ष्मी प्राथमिक शाळा, तिसवाडी आनी ईशा साळकार- द रोझरी स्कूल, मीरामार-तिसवाडी हांचो आस्पाव आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
