भांगरभूंय | प्रतिनिधी
नवी दिल्ली, खबरां संस्था: राज्यघटनेचे उद्देशिकेंत ‘समाजवादी’, ‘धर्मनिरपेक्ष’ आनी ‘एकात्मता’ ह्या शब्दांचो आसपाव करपाक आव्हान दिवपी याचिका सर्वोच्च न्यायालयान सोमारा भायर मारली. ‘समाजवादी’ हो शब्द दाव्या वा उजव्या अर्थीक धोरणां कडेन नाशिल्ल्यान तो कल्याणकारी प्रजासत्ताकाचें द्योतक आशिल्ल्याचें न्यायालयान निकालांत नमूद केलें.
१९७६त तेन्नाची इंदिरा गांधी सरकारान राज्यघटनेंत ४२वी दुरुस्ती करून उद्देशिकेंत ह्यो तीन संज्ञा जोडिल्ल्यो. राज्यसभेचे आदले खासदार सुब्रमण्यम स्वामी आनी वकील अश्विनी उपाध्याय हांणी उद्देशिकेंतल्या ‘समाजवादी’ आनी ‘धर्मनिरपेक्ष’ ह्या दोन संज्ञांच्या आसपावाक आव्हान दिवपी याचिका दाखल केल्यात. ताचेर सरन्यायाधीश संजीव खन्ना आनी न्या. संजय कुमार हांच्या घटनापीठान २२ नोव्हेंबराक आपलो निकाल राखीव दवरिल्लो. ह्या प्रकारची पयली याचिका बलराम सिंह हांणी वकील विष्णू शंकर जैन हांचे वरवीं २०२०त दाखल केल्ली.
-राज्यघटना वा उद्देशिका खंयच्याय विशिश्ट, दाव्या वा उजव्या, अर्थीक धोरण वा रचनेचो पुरस्कार करिना.
-समाजवादा कडेन शासनाची कल्याणकारी राज्या प्रती आनी संदीच्या समानताये प्रती कटिबद्धता हे नदरेन पळोवपाक जाय.
-भारतीय चौकटींत तातूंत अर्थीक आनी समाजीक न्यायाच्या तत्त्वांचो आस्पाव जाता.
-अर्थीक वा समाजीक परिस्थितीक लागून खंयचोच नागरीक पयस उरचो ना हाची शासन खबरदारी घेतलें.
-समाजवाद खासगी उद्यामशीलतेचेर तशेंच अनुच्छेद १९(१)(ग) खाला मोलादीक अधिकार आशिल्ल्या उद्देग आनी वेपार करपाच्या अधिकारांचेर निर्बंध हाडिनात.
-१९७६त केल्ले सुदारणेक लागून भारताचें वर्णन ‘स्वायत्त, लोकशाय गणराज्य’ हाचे बदला ‘स्वायत्त, समाजवादी, धर्मनिरपेक्ष, लोकशाय गणराज्य’ अशें करपाक लागले.
-आणीबाणीच्या काळांत संसदेन घेतिल्ले सगळे निर्णय रद्द थारतात अशें म्हणपाक जावचें ना, अशेंय न्यायालयान नमूद केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
