भांगरभूंय | प्रतिनिधी
महाराष्ट्र आनी झारखंड ह्या दोन राज्यांच्या विधानसभा वेंचणुकां सयत हेर कांय राज्यांनी जाल्ल्या विधानसभा पोट वेंचणुकेचो
जो कितें निकाल लागला, ताचो देशाच्या वट्ट राजकारणाचेर नेमको कितें परिणाम जावंक शकता हाचो विचार करीत जाल्यार, भारतीय जनता पक्षाची चालू आशिल्ली घोडधांव आडावप काँग्रेस आनी हेर विरोधी पक्षां खातीर अदिकूच कठीण जावंक शकता असोच निश्कर्श काडूंक येतलो. महाराष्ट्र विधानसभा वेंचणुकेंत जें कितें घडलें तें जशें अनपेक्षीत आशिल्लें तशें झारखंडांतूय भाजपप्रणीत आघाडीची जाल्ली हार कोणाकूच अपेक्षीत नाशिल्ली. महाराष्ट्रांत मोदी-शाह हांणी केल्ली जादू झारखंडांत चल्ली ना, जाल्यार उत्तर प्रदेशांतल्या णव विधानसभा मतदारसंघांतले पोट वेंचणुकेंत आदित्यनाथ योगी हांची ‘बटेंगे तो कटैंगे’ हो मंत्र बरे पैकीं चल्लो. समाजवादी पार्टीच्या अखिलेश यादवाक लोकसभा वेंचणुकेंत सांपडिल्ली लय तातूंत पुरायपणान उद्धवस्त जाली. बिहारांतले विधानसभा पोट वेंचणुकेंतूय भाजपान राष्ट्रीय जनता दलाक तकली वयर काडपाची मात लेगीत संद दिली ना. झारखंडांत नांवां पुरत्या येसाक लागून काँग्रेसीक मोटो राजकी लाव जावपाची जशी आशा बाळगूंक येवची ना, तशेंच वायनाडांतल्यान प्रियांका गांधी हांणी लोकसभेंत केल्लो प्रवेशूय ह्या पक्षा खातीर उमेद वाडोवपी थारतलो अशेंय म्हणूंक येवचें ना. महाराष्ट्रांत जाल्यार काँग्रेसीचें अस्तित्वूच सोंपपाच्या मार्गार आशिल्लो निश्कर्श काल-पयर जाल्ल्या वेंचणूक निकालांतल्यान जसो काडटात तसोच उत्तर प्रदेशांतूय समाजवादी पक्षाच्या अपेसान तांचेर इंडी आघाडीत तिगून रावचें काय ना हाचेर विचार करपाची वेळ आयल्या.
महाराष्ट्रांतलो वेंचणूक निकाल भारतीय जनता पक्षाक अदिकूच फायदेशीर थारतलो हातूंत दुबाव ना. झारखंडांत काँग्रेसीक परतून सत्तेंत वांटेकार जावंक मेळ्ळें तरी थंयचें मर्यादीत येस हें त्या पक्षाचें मनोबल वाडोवपी नक्कीच ना. तातूंतच पक्षाची महाराष्ट्रांत जाल्ली वाताहात आनी उत्तर प्रदेशांत समाजवादी पक्षाचेर भाजपान केल्ली कुरघोडी हातूंतल्यान तांचो फुडलो प्रवास अदिकूच कठीण आसतलो हाची कल्पना राहूल गांधी आनी तांच्या पक्षाक आयली नासत अशें म्हणूंक येवचें ना. ‘इंडी’ आघाडीक महाराष्ट्रांत बरे पैकीं येसाची अपेक्षा आशिल्ली. पूण निकाल मात उरफाटो लागलो. फक्त लज वाटावपा इतले कपडे उद्धव ठाकरे, शरद पवार आनी नाना पटोले हांच्या आंगार दवरून महायुतीन तांची जी दैना केली ती पळयत जाल्यार हातूंतल्यान तकली वयर काडपा खातीर फुडलीं पांच वर्सां तांकां उणीं पडटलीं. अशा निकालांचे फाटभुंयेर विरोधी ‘इंडी’ आघाडीचो फुडार कितें हाचो विचार करीत जाल्यार भाजपाच्या वादळा मुखार तिगून रावप तांकां कितले मेरेन शक्य जातलें हे विशीं कोणाकूय दुबाव येवप सहाजिकूच आसा. हरयाणा व्हगडायले उपरांत महाराष्ट्र तरी जिखपा खातीर काँग्रेस आनी इश्ट पक्षांनी सगलें कितें केलें, पूण लोकांची विस्वासार्हता पुरायपणान व्हगडावन बशिल्ल्या विरोधकांचो इतलो कोयर जावचो तो पळयत जाल्यार जो कितें संदेश जागरूक मतदारांक दिवपाचो आशिल्लो तो तांणी दिला अशें अनुमान काडूं येतलें.
‘इंडी’ आघाडीतले पक्ष एकामेकांचे पांय ओडपा खातीर वावरत आशिल्ल्याचें स्पश्ट चित्र सद्या महाराष्ट्रांतूच न्हय जाल्यार देशांत सगली कडेन दिसून येता. चडांत चड सुवातो मेळोवपा खातीर महाराष्ट्रांत उबाठाची शिवसेना आनी काँग्रेसींत जी तणातणी जाली ती मतदारूय उक्त्या दोळ्यांनी पळयताले. मुख्यमंत्रीपद हातासपा खातीर आपल्या पक्षाचे उमेदवार चड वेंचून येवपाची गरज आशिल्ल्यान इश्ट पक्षांच्या उमेदवारांक हारोवपाक प्राधान्य दिलें आनी ताचो परिणाम जावपाचो आशिल्लो तोच जालो. भाजपाच्या वादळांत ‘इंडी’ व्हांवून गेली. महाराष्ट्रांत वेंचणुकेचो प्रचार चालू आसतना थंय दिल्लींत आम आदमी पार्टीन काँग्रेसी आड यात्रा सुरू करून वेगळोच संदेश दिला. अरविंद केजरीवालान ‘इंडी’ उमेदवारां खातीर महाराष्ट्रांत एखादी प्रचार सभा घेवची अशेंय दिसचें न्हय, हाका कितें म्हणप? विरोधी आघाडीतले पक्ष एकामेकां आड लडत आशिल्ल्यान भाजपाचें फावलें आनी संघशक्तीच्या बळाची ताका जोड मेळिल्ल्यान महाराष्ट्रांत एक चमत्कारूच घडलो. महाविकास आघाडीतल्या तिनूय पक्षांक मेळून पन्नास लेगीत सुवातो मेळ्ळ्यो नात हाचे अजाप तर दिसताच, पूण तेच बरोबर हो निकाल आघाडीत मोटी बिघाडी निर्माण करूंक शकपी थारतलो असो तर्क काडीत जाल्यार तो चुकीचो थारचो ना. काँग्रेस महाराष्ट्रांत परतून उद्धव ठाकरे वांगडा वेंचणुकांक सामकार वतली ही शक्यताय पुरायपणान सोंपिल्ल्यातूच जमा आसा, आनी हातूंत अर्थांतूच उबाठाचे शिवसेनेक कोणूच वाली उरचो ना हें स्पश्ट जालां. मुख्यमंत्रीपदा खातीर शरद पवाराक वेंग मारपी उद्धव ठाकरेन स्वता आनी आपल्या पक्षाकूय सोंपयला.
शरद पवारूय आतां सोंपिल्ल्यांतूच जमा आसा हेंच महाराष्ट्राच्या निकालान दाखोवन दिलां. महाराष्ट्रांत दोनूय काँग्रेसीचेर अशी परिस्थिती येवची हें विरोधी आघाडीच्या फुडाराचो विचार करीत जाल्यार निश्चीतपणान ही बऱ्याची गजाल न्हय. लोकसभा वेंचणुकेंत विरोधी आघाडीन जें कितें जोडिल्लें तें सगलेंच राहूल गांधी आनी तांच्या इश्टांनी व्हगडायलें. लोकसभा वेंचणुकेंत उत्तर प्रदेशांत भाजपाक जड गेल्ल्या अखिलेश यादवाक आदित्यनाथ योगी हांणी परतून जमनीर हाडला. फाटले तीन-चार म्हयने अखिलेश यादव हवेंतूच वावुरताले आनी विधानसभा पोट वेंचणुकेंतूय सगल्यो सुवातो जिखपाची भास उलयताले. पूण तांच्या हाताक फक्त दोनूच सुवातो मेळ्ळ्यो. काँग्रेसीक पयस दवरपाचें व्हड मोल तांकां मेजचें पडलें. मुस्लिमांची चड संख्या आशिल्ले दोन मतदारसंघूय व्हगडावपाची वेळ समाजवादी पक्षाचेर आयली आनी राजकारणांत सदांच कांयच नासता हाचो पुनर्प्रत्य तांकां अवघ्या तीन-चार म्हयन्यांत आयलो. अखिलेशाच्या नादाक लागून काँग्रेसीन उत्तर प्रदेशांतलें आपलें अस्तित्व सोंपयिल्ल्यान थंयच्या पोट वेंचणुकांचो निकाल काँग्रेस आनी तांच्या राहूल गांधीच्या दोळ्यांत अंजन घालपी थारचो. साठ-सत्तर वर्सां देशाचेर राज्य करपी काँग्रेस आतां परजिवी थारल्या अशें प्रधानमंत्री नरेंद्र मोदी सेगीत सांगत आसात. हरयाणा, महाराष्ट्र, उत्तर प्रदेश ह्या राज्यांतल्या वेंचणुकांच्या निकालांचो अभ्यास करीत जाल्यार काँग्रेस आनी तांच्या फुडारपणा खालच्या आघाडीचो फुडार घाताक आयिल्ल्याचें अधोरेखीत जालां. दिल्लींत फुडल्या दोन अडेज म्हयन्यांत जावपी वेंचणुकेंत काँग्रेस आम आदमी पार्टीच्या हड्ड्यार बशिल्ल्याचें चित्र दिसूं येता. अशे परिस्थितींत विरोधी इंडी आघाडी तिगून उरत जाल्यार तो एक चमत्कारूच थारुये.
वामन प्रभू
9823196359
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
