भांगरभूंय | प्रतिनिधी
गोरवां सांबाळ खात्याच्या मंत्र्यांनी घेतली बसका
पणजी : हेडग्या गोरवांची येरादारी तशेंच शेडीच्या देखभाली खातीर गोशाळांक अर्थीक मजत दिवपाचो प्रस्ताव आसा. ह्या प्रस्तावाचेर बसकेंत चर्चा जाली. सध्या येवजणे खाला मेळपी पयशे गोशाळांक पावनात. हाका लागून येरादारी, शेडी खातीर अर्थीक साहाय्य दिवपाचो प्रस्ताव आसा.
हेडग्या गोरवांच्या प्रस्नाचेर अधिकाऱ्यां सयत मंत्री निळकंठ हळर्णकार हांणी बसका घेतली. हेडगीं गोरवां सगल्याक दिश्टी पडटात. हाका लागून खूबशे अपघात जातात. हेडग्या गोरवांची वेवस्था गोशाळांनी जावपाक जाय. हाका लागून गोशाळाक भरीव मजत दिवपाक जाय. ह्या प्रस्तावाचेर चर्चा जाली, अशी म्हायती मंत्री नीळकंठ हळर्णकार हांणी दिली.
गांवगिऱ्या वाठारा सयत शारांनी लेगीत हेडगीं गोरवां आसतात. हीं गोरवां रस्त्या वेल्यान भोंवतात तशेंच कांय वेळार बसून रावतात. रातच्या वेळार हीं गोरवां वाहनचालकांक दिश्टी पडनात. हाका लागून अपघात जातात. हेडग्या गोरवांक लागून अपघात जावपा सयत जीव वचपाच्यो बऱ्याच घडणुको घडल्यात.
हेडग्या गोरवांक व्हरून तांची देखभाल करपा खातीर सरकारान येवजण तयार केल्या. गोशाळां खातीर ही येवजण आसा. गोरवांची येरादारी आनी शेडीच्या देखभालीक बरोच खर्च येता. हाका लागून रस्त्या वेलीं हेडगीं गोरवां व्हरप गोशाळांक शक्य जायना. गोरवां व्हरपाचो खर्च गोशाळांक मेळटलो, अशी तजवीज सरकार करतलें. तशेंच गोरवां दवरपा खातीर गोठो/शेड आसची पडटा. गोठो वा शेड बांदले उपरांत देखभाल करची पडटा. हाकाय बरोच खर्च येता. शेडी खातीर योग्य अशें अर्थीक सहाय्य गोशाळांक मेळटलें.
हालींच रस्तो सुरक्षा मंडळाची बसका जाली. हे बसकेंत हेडग्या गोरवांचो विशय चर्चेक आयलो. येरादारी मंत्री मॉवीन गुदिन्हो हांच्या फुडारपणा खाला बसका जाली. अपघातांच्या हेर कारणा सयत हेडगीं गोरवां हें एक मुखेल कारण आसा. हेडग्या गोरवांचेर उपाय काडपाची जापसालदारी गोरवां सांबाळ खात्याची आसा. हाका लागून हेडग्या गोरवांचे समस्येचेर मंत्री नीळकंठ हळर्णकार हांणी बसका घेतली. हेडग्या गोरवांचो सांबाळ गोशाळांकूच करप शक्य आसा. मयें, वाळपय आनी हेर वाठारांनी गोशाळा आसात. हेडग्या गोरवांचो सांबाळ करून गोशाळा दुदाचे उत्पादन करता. ते भायर शेणा सावन सारें तशेंच गोमुत्र तयार करता. हातूंतल्यान गोशाळांक येणावळ येता. सरकारा काडल्यान मेळपी अनुदान आनी देणग्यांचेर गोशाळांचो कारभार चलता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
