भांगरभूंय | प्रतिनिधी
भांगरभूंय । समीप नार्वेकार
पणजीः चित्रपट मळाचेर ओमकार नायक ह्या तरणाट्यान दोळ्यांत भरपा सारकी कामगिरी केल्या. 100 क्रिएटिव्ह मायंड ऑफ टुमारो हे 48 वरां भितर लघुपट करपाचे सर्तींत नायक हाणें देशांतल्या हेर 100 तरणाट्या फिल्म निर्मात्यां वांगडा वांटो घेवन आपल्या पंगडा खातीर उत्कृश्ट अभिनेत्री आनी उत्कृश्ट संहिता हे दोन पुरस्कार मेळयले. हे सारिकिल्ली सर्त गोंयच्या चित्रपट मळाक बॉलिवूड पांवड्यार व्हरपाक मजत करतली, अशें ओमकार म्हणटा.
क्रिएटिव्ह मांयड ऑफ टुमारो हे 48 वरां भितर लघुपट करपाचे सर्तींत 100 जाणांनी वांटो घेतिल्लो. तांचो स जाणांचो पंगड तयार करून थारावीक बजेटांत 48 वरां भितर 5 ते 6 मिण्टांचो लघुपट तयार करपाक सांगिल्लो. हे सर्तीत गोंयचो ओमकार नायक हो सहाय्यक दिग्दर्शक म्हूण वांटेकार जाल्लो.
हे विशीं उलयतना ओमकार हाणें सांगलें, भायल्या नवोदीत फिल्म निर्मात्या वांगडा काम करून खूब शिकपांक मेळ्ळें. 48 वरां भितर लघुपट करप हे खूब आव्हानाचें आशिल्ले. अश्या आव्हानांक लागून खूब कितें शिकपाक मेळटा. गोंयांत प्रॉडक्शन आसा, पूण कांय गजाली आमकां खबर नात. आपूण फिल्म स्कुलांतल्यान शिकून येवंक ना, आपूण पळोवन फिल्म करपाक शिकला. प्रॉडक्शन डिझायन, स्क्रिप्ट बरोवप, दिग्दर्शन, सिनेमेटोग्राफी हे विशय खोलायेन वचून शिकपाक मेळ्ळे. ह्या गजालींचो वापर करून गोंया खातीर बरीं फिल्मां कशीं दिवपाक मेळटलीं हें शिकपाक मेळ्ळें, अशें ओमकार म्हणटा.
48 वरां भितर चित्रपट करप हें एक व्हड आव्हान आशिल्लें. दोन दिसां पयलीं आमकां स्क्रिप्ट मेळिल्ली. खंयचें थळ वेंचपाक जाय, शुटींग लेन्स खंयचे वापरप, स्क्रिप्ट आनीक कशी सुदारप, कलाकार वेंचप ह्योगजाली करपाच्यो आशिल्ल्यो. आपूण सहाय्यक दिग्दर्शक आनी निर्माता पंगडांत आशिल्लो. गोंयांत राविल्ल्या कारणान सगळें बेगीन एकठांय करपाक शकलों. पांच फिल्मां सर्तींत आशिल्ली. तातूंतल्या आमच्या फिल्माक उत्कृश्ट अभिनेत्री आनी उत्कृष्ट स्क्रिप्ट हे पुरस्कार मेळ्ळे, अशी म्हायती ओमकार हाणें दिली. आतां फुडाराक म्युझीक व्हीडीयो, शॉर्ट फिल्म, फिचर फिल्म तयार करपाचो आपलो विचार आसा. गोंयांत फिल्म हो बरो प्रॉडक्ट तयार करून तो बॉलिवूड पांवड्यार कसो व्हरप हाचेर आमी लक्ष दितले. आमी शिकत रावतले आनी आनीक सुदारणा करपाचे यत्न करतले, अशे ओमकार हाणें सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
