भारतरत्न लालकृष्ण अडवाणी हांचो आशीर्वाद घेवप हो भाग्याचो खीणः मुख्यमंत्री
भांगरभूंय | प्रतिनिधी
पणजी, प्रतिनिधी ः उपप्रधानमंत्री भारतरत्न लालकृष्ण अडवाणी हांची भेट घेवन तांचो आशीर्वाद घेवप हो म्हजे खातीर परम भाग्याचो खीण. अडवाणी हांचे फुडारपण आनी संघटनात्मक कुशळटायेक लागून म्हजे सारकिल्या जायत्या कार्यकर्त्यांक राष्ट्रसेवा आनी भौशीक वावर करपाची प्रेरणा मेळ्ळ्या अशें मुख्यमंत्री डॉ. प्रमोद सावंत हांणी म्हणलें.
महाराष्ट्रांत पक्षाक येस मेळ्ळे उपरांत डॉ. सावंत सध्या दिल्लींत केंद्रीय मंत्री आनी भाजपा फुडाऱ्यांची भेट घेतात. केंद्रीय न्हंय येरादारी मंत्री सर्बानंद सोनोवाल हांची तांणी भेट घेतली. तशेंच इंडिया इंटरनॅशनल ट्रेड फेराक भेट दिवन गोवा पॅव्हेलियनाची पळोवणी केली. हाचे भायर पक्षाचे वरिश्ठ फुडारी लालकृष्ण अडवाणी हांचीय भेट घेतली.
मुरगांव बंदरांतल्या इतिहासीक वायसरीगरल पॅलेसाचे अवशेश गोंय सरकाराच्या ताब्यांत दिवपा विशीं मुख्यमंत्र्यान मंत्री सोनावाल हांचे कडेन चर्चा केली. वायसरीगरल पॅलेसाचे जतन आनी नुतनीकरण राज्य सरकार करतले. हे खातीर ताचो ताबो राज्य सरकारा कडेन दिवप गरजेचें आसा अशी म्हायती मुख्यमंत्र्यान दिली. तशेंच मुरगांव बंदराचेरूय हे भेटींत चर्चा जाली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
