भांगरभूंय | प्रतिनिधी
सांगें, प्रतिनिधी ः नेत्रावळी अभयारण्याच्या लागसारच्या वाठारांत रावपी जायते शेतकार शेतवडींतल्यान आपलें पोट भरतात. नाल्ल, केळी, अनस, ऊस, भाजी, कणगां आदी तें पिकयतात. पूण शेतांत येवपी माकड, गवें, रानदुकर आनी हेर जनावरांक लागून शेतकारांचे लुकसाण जाता. हाका लागून आतां शेती कशी करची तें सांगात, अशें प्रस्न शेतकार करतात. माकडांक लागून नाल्लाचें खूबच लुकसाण जाता अशें एका शेतकारान सांगलें.
ह्या पुराय वाठाराक ‘इको सेन्सिटिव्ह झोन’ म्हूण घोशीत केला. ताका लागून पोत्रे, भाटी, विलियन, कुंभारी, डोंगरी,नायकीनी, शिगोणे आनी हेर गांवांचेर खूब निर्बंध आसात.
मजगतीं, फाटल्या 10 वर्सांत जनावरांची संख्या खूब वाडल्या. अभयारण्यांत जनावरांची योग्य वेवस्था जाली ना जाल्यार तीं शेतांत भितर सरून नासाडी करतात आनी ताका लागून लुकसाण जाता. विशेश म्हणल्यार दर सप्तकांत २०- २५ माकडांचो कळप हांगा येता आनी शेतीची नासाडी करतात.
रान खात्यान ह्या जनावरांचो बंदोबस्त करचो वा दरवर्सा आमकां जावपी लुकसाणाची भरपाय दिवची अशी मागणी भाटी, वालकीनी, वाडे, नेत्रावळींतले नाल्ल उत्पादक तशेंच हेर शेतकार करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
