महायुतीचें एकतर्फी महाजैत

भांगरभूंय | प्रतिनिधी

गोंय मुक्ती उपरांत महाराष्ट्रवादी गोमंतक पक्षाचें सरकार सत्तेर आयलें. त्या काळांत शिंव निशाणेचेर फातर पसून उबो केल्यार तो वेंचून येतलो अशें कांय लोक म्हणटाले. शेनवारा महाराष्ट्र विधानसभा वेंचणुकेचो निकाल कांयसो असोच म्हणचो पडटलो. कारण महायुतीचे तालुको राजकारणा पुरतेच मर्यादीत आशिल्ले, वेंचून येतले हाची खात्री नाशिल्ले, मंत्र्यांचे खाजगी सचीव…. सगलेच वेंचून आयले. महायुतीचे अडीचशे वयर उमेदवार वेंचून आयल्यात, तर विरोधी महाआघाडीचें जैत 60 आंकड्यां मेरेन पसून पावूंक नात. राज्यांतलो फाटल्या पन्नास वर्सांतलो हो जैताचो सगल्यांत चड फरक आशिल्लो निकाल. मदीं काँग्रेसीक 200+ जागे मेळिल्ले, पूण हे फावट महायुतीन सगल्यांकूच फाटीं उडयल्यात. निकालाच्या धपक्यांतल्यान विरोधक अजून सांवरूंक नात. राज ठाकरे हांणी ‘अविश्वसनीय’ इतलीच प्रतिक्रिया दिल्या, हाचे वयल्यान विरोधकांक कितलो व्हडलो धपको बसला, ताचो अदमास येता. आयज मुख्यमंत्री म्हूण कोणाची निवड जातली, तें कळटलें. जागे चड मेळिल्ल्यान भाजपाचे देवेंद्र फडणवीस हांकांच तें कदेल मेळटलें. पूण, श्रेश्ठी वेगळो निर्णय घेवन राजकी मळाक धपकोय दिवपाक शकतात!
जाणकार ह्या आगळ्या जैता फाटलीं साबार कारणां सांगतात. मात अजून कोणे उघडपणान ईव्हीएम मशिनाचेर दुबाव घेवंक ना. ‘लाडकी बहीण’ येवजणेक लागून हो चमत्कार जालो, अशें दावे कांय जाणांनी केल्यात. विरोधकांनीय तसोच सूर लायला. लोकसभा वेंचणुके वेळार महायुतीक मतदान करपी बायलांची टक्केवारी हे खेपे स टक्के वाडल्या. तरीय वट्ट अडीचशे बायल उमेदवारां मदल्यो फक्त 21 वेंचून आयल्यात. सध्या हे येवजणे खाला बायलांक देड हजार मेळटात. आतां 2100 मेळटले. महाराष्ट्रांत एक कोटी बायलांक तरी ही येवजण मेळपाक जाय. म्हणटकच इतलो दुडू खंयच्यान उबो करतले, हो पेज सरकाराचे तकलेर आसतलोच. दुसरी गजाल, विवीध अर्थीक येवजण्यांक लागून जर मतदार आकर्शित जाल्यात, तर ती तशी हुस्को करपा सारकी गजाल. कारण मुफत येवजण्यांची एकदां चटक लागली काय मागीर कश्ट- मेहनती वयलो विस्वासूच उडून वता. आत्मविस्वास शेणटा. देशाचे बळीश्ट उबारणे खातीर हें घातक थारुं येता.
आनीक एक हे वेंचणुकेंत सिद्ध जालां, तें म्हणल्यार पक्षांतर, बंडखोरी करप्यांक लोकांनी हात दिला. आमच्या गोंयांत पसून रातयां पक्ष बदलप्यांक, दुसऱ्या पक्षांत वचून परत आदल्या पक्षांत येवप्यांक लोकांनी वेंचून दिल्यात. म्हणटकच मुफत येवजण्यां भशेन हेंय वारें फुडाराक आनीक नेटान व्हांवपाक लागलें जाल्यार अजाप न्हय. घडये हें चरतें देशभरांत आनीक नेटान पातळूं येता. तत्वनिश्ठ, ध्येयनिश्ठ, गुणेस्त, मेहनती, पारदर्शक, परोपकारी, नितळ उमेदवाराकूच वेंचून दिवपाक जाय, अशें सगलेच म्हणटात, मात चडशे फावट वादग्रस्त उमेदवारुच वेंचून येतात. महाराष्ट्रांत शिवसेना आनी राष्ट्रवादी काँग्रेसीच्या बंडखोर गटांचे दोग- तिगूच जिखतले, अशें सगलेच म्हणटाले. मात, शिंदे गटाचे 57 आनी अजित पवार गटाचे 41 उमेदवार वेंचून आयल्यात. महाआघाडीच्या सगल्या उमेदवारांची बेरीज पसून केल्यार तितली जायना. राजकी फुडाऱ्यांनी हाचे मुखार फक्त लोकांची उदरगतूच नदरे मुखार दवरून आपणाक जाय तेन्ना पक्षांतर करपाचें असो पाचवो बावटोच ह्या निकालान दाखयला अशें म्हणपाचें? महाराष्ट्रांत वादग्रस्त उलोवपाची परंपरा आसा. काल शिवसेनेचे (उद्धव) खासदार संजय राऊतान अपेसाचो बुडकुलो निवृत्त सरन्यायाधीश चंद्रचुड हांचेर फोडलो.खरी शिवसेना, राष्ट्रवादी खंयची तो निर्णय बेगीन दिल्लो जाल्यार निकाल वेगळो लागपाचो असो दावो राऊत हांणी केलो. शरद पवार हांणी मात निकाला फाटलीं कारणां समजून घेवप आनी परत नेटान काम करप हाची चड गरज आसा, अशें म्हणलें. आघाडे आड अपप्रचारूय जाला अशें तांकां दिसता.
महायुतीन तळागाळांत वचून काम केलां. भाजपाची, हिंदुत्ववादी संघटनांनी पेजाद यंत्रणा आसा, ताचो फायदो जाला. तातूंत ते सत्तेंत आशिल्ल्यान तांणी वेंचणुकेची घोशणा मुखार वतली हाचीय जतनाय घेतल्या आसतली. त्या काळांत सरकाराक बऱ्योच येवजण्यो चालीक लावंक मेळ्ळ्यो. ताचो सत्ताधारी पक्षांक व्हडलो फायदो जालो. काँग्रेसीन फकत वयले वयर आनी शारां पुरतेंच पळयलें. बायल मतदारांची टक्केवारी वाडली, ताचो फायदो महायुतीक जालो. बटेंगे तो कटेंगे- एक है तो सेफ है ह्यो घोशणा, शेतकार, बेरोजगार, तरणाटे हांचे खातीर येवजण्यांची घोशणा… हांचेय महायुतीच्या जैतांतलें योगदान न्हयकारपाक मेळचें ना. हे वेंचणुकेंत मतदारांक केन्ना न्हय तितल्या पयश्यांचें वांटप जालां, म्हणून जैत मेळ्ळे, असो आरोप महाआघाडीच्या फुडाऱ्यांनी, समर्थकांनी केला. हें कायद्यान सिद्ध करप तशें कठीणूच. कितेंय आसलें तरी जैत तें जैत. निमणो लोकांचो कौल म्हत्वाचो. ताचो आदर दरेकल्यान दवरूंक जाय.