‘गुल्लू’ चित्रपटाची ‘सीएमओटीं’त तुस्त तोखणाय

भांगरभूंय | प्रतिनिधी

पणजीः इफ्फींत ‘क्रिएटिव्ह मायंड्स ऑफ टुमारो’ (सीएमओटी) ह्या उपक्रमाचो समारोप सुवाळो शेनवारा मॅकनीझ पॅलेसींत जालो. ह्या उपक्रमा खाला 48 वरां भितर चित्रपट निर्मिती करपाची आसता. अंदूं हे चित्रपट निर्मितींत ‘गुल्लू’ चित्रपटा सर्वोत्कृश्ट चित्रपटा सयत सर्वोत्कृश्ट दिग्दर्शक आनी सर्वोत्कृश्ट अभिनेतो अशी तीन इनामां फावो जालीं.

सर्वोत्कृश्ट चित्रपटाचो उपजैतवंत ‘वी हियर द सेम म्युझीक’ चित्रपट थारलो. सर्वोत्कृश्ट दिग्दर्शक आर्शली जोस (गुल्लू), सर्वोत्कृश्ट कथा अधिराज बोस (लव्हपिक्स सबस्क्रिप्शन), सर्वोत्कृश्ट अभिनेत्री विशाखा नायर (लव्हपिक्स सबस्क्रिप्शन) आनी सर्वोत्कृश्ट अभिनेतो पुष्पेंद्र कुमार (गुल्लू) हांकां इनामां फावो जालीं.

चित्रपट निर्मिती प्रक्रियेंतल्या 13 फांट्यांत 100 य़ुवा प्रभिभावंत कलाकारांचो आस्पाव आशिल्लो. ह्या 13 फांट्यांनी आपली प्रतिभा सादर करपा खातीर पुराय देशांतल्यान सुमार 1,070 कलाकारांच्यो प्रवेशिका आयिल्ल्यो. 20 वांगडी आशिल्ल्या पांच पंगडांनी ‘तंत्रज्ञानाच्या युगांतलें नातेंसंबंद’ ह्या विशयाचेर आदारीत लघुपटांची निर्मिती केल्ली. म्हायीत आनी प्रसारण मंत्रालयाची विशेश सचीव निरजा शेखर, एनएफडीसीचे प्रसारण जोडसचीव आनी वेवस्थापकीय संचालक प्रितुल कुमाल, चित्रपट जोडसचीव वृंदा देसाय तशेंच म्हायती आनी प्रसारण मंत्रालयाचे आदले सचीव अपूर्वा चंद्रा हांचे सयत साबार मानेस्त हे कार्यावळीक हाजीर आशिल्ले.