भांगरभूंय | प्रतिनिधी
अनुपम खेरः मास्टर क्लासींत सांगल्यो वैयक्तीक जिणेंतल्यो घडणुको
भांगरभूंय । खबरां मेज
पणजीः म्हाका दिसता हांव स्वताच म्हज्या अपयेसांची यशोगाथा आसा. म्हजी कथा शिमल्यांत सुरू जाली. जंय 14 जाणांचें कुटुंब एके कुडींत रावतालें. घरांत बापूय हो एकलोच जोडपी. एका अर्थान ते गरीब आशिल्ले. आजो सदांच सांगतालो, जेन्ना एकादी व्यक्ती खूब गरीब आसता, तेन्ना ताचे खातीर खोस सगळ्यांत सवाय आसता, अशें हिंदी चित्रपट मळा वयले नामनेचे अभिनेते अनुपम खेर हांणी सांगलें.
55 व्या भारतीय आंतरराष्ट्रीय चित्रपट महोत्सवाच्या (इफ्फी) चवथ्या दिसा आयतारा पणजे कला अकादमींत अनुपम खेऱ हांच्या मार्गदर्शना खाला मास्टर क्लास जाली. ‘पॉवर ऑफ फेल्युयर’ ह्या विशयान सत्राक सुरवात जाली. हे क्लासींत ते उलयताले.
पांचवे यत्तेंत शिकतना शाळेच्या नाटकांत पयले खेपे काम केलें. त्या वेळार आपल्याक उमेद वाडोवपी इनाम लेगीत मेळूंक ना, हाचें दुख्ख जाल्लें. त्या दिसा बापायन आपल्याक शिकयलें, अपेस ही एक घडणूक आसता, व्यक्ती न्हय. फुडल्या यत्नांत विलियम शेक्सपियराच्या ‘मर्चंट ऑफ व्हेनीस’ ह्या नाटकांत आपल्याक दिल्ल्या संवादाच्या दोन ओळींत 27 चुको केल्यो. करता करता ते दीस फाटीं पडले आनी एक दीस नॅशनल स्कूल ऑफ ड्रामा (एनएसडी) संस्थेंतल्यान भांगरा पदक घेवन पयलेच खेपे मुंबय आयलों. एनएसडीचो भागरा पदक जैतवंत आशिल्ल्यान आपल्याक पयल्याच यत्नांत आपूण ही मायानगरी जिखतलों, असो आपल्याक आत्मविस्वास आशिल्लो, पूण कांय म्हयन्यांतूच वांद्रे पूर्व रेल्वे स्टेशनाचेर 27 दीस रावचे पडलें, अशें खेर हांणी सांगलें. खूबश्या समस्यांक फुडो केले उपरांत ‘सारांश’ चित्रपटांतले भुमिके खातीर पुरस्कार फावो जालो. 1984 त दिल्लींतल्या इफ्फी महोत्सवांत आपणे भेट दिल्ली. अंदूं ह्या मास्टर क्लासी वांगडा इफ्फींतले आपले पयले भेटीक 40 वर्सां पुराय जालीं, अशें खेर हांणी सांगलें.
‘केन्नाच हार मानू नाकात’
अनुपम खेर हांचे खातीर जीण म्हणल्यार व्हड संघर्श आशिल्लो. ‘हम आपके है कौन’ चित्रपटाचे शुटिंगे वेळार चेऱ्याक आरी मारली. 2004 त खेर सामकेच खांकनवाळ जाले. दर खेपे तांणी तांच्या बापायन आनी आज्यान दिल्ली शिकवण पाळ्ळी. 68 वर्सा पिरायेच्या खेर हांणी आपल्या प्रभावी व्यक्तीमत्वान, स्पश्ट विचारांनी आनी अभिनयान आपल्या जिणेच्या तत्वज्ञानाच्या टॉनिकान प्रेक्षक भारावन गेले. तांच्या तत्वज्ञानाचो सार म्हणल्यार ‘केन्नाच हार मानू नाकात’ असोच आशिल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
