भांगरभूंय | प्रतिनिधी
म्हापशें : आवाज प्रदुशणा वयल्यान हणजूण- कायसूव ग्रामसभेंत दोन गटांत वाद जालो. गांवांतल्या आवाजाच्या प्रदुशणा आड लढो दिवपी वावुरप्यां मदले एक इनासियो फर्नांडीस हांकां गजानन तिळवे हांणी मारपेट केली. सरपंच लक्ष्मीदास चिमुलकार हांणी वाद जातकच ग्रामसभा तहकूब केली.
सकाळीं पंचायतीची सर्वसाधारण ग्रामसभा सरपंच चिमुलकार हांचे अध्यक्षते खाला जाली. सुरवातेक फाटले बसकेचें इतिवृत्त वाचतना कांय ग्रामस्थांनी आवाजाचें प्रदुशण ह्या विशयाचेर चर्चा करपाची मागणी केली.
तर कांय जाण ओगीच आवाजाच्या प्रदुशणाचो विशय काडून कागाळी करतात. पयलींच पर्यटन वेवसाय हाल्ला. तातूंत अश्यो कागाळी केल्ल्यान ग्रामस्थांच्या वेवसायाचेर परिणाम जाला. रातच्या १० वरां उपरांत आवाजाचीं यंत्रणां वाजोवपाक बंदी आसा. मात सांजेवेळार ७ वरां सावनूच आपल्याक समाजीक कार्यकर्ते म्हणोवन घेवपी कांय जाण कागाळी करपाक धांवतात, असो आरोप कांय लोकांनी ह्या वेळार केलो.
हाका लागून इनासियो फर्नांडीस आनी हेरां मदीं वाद निर्माण जालो. ह्या वेळार गजानन तिळवे हांणी इनासियो हाका धपको दिवन मारपेट करपाक सुरवात केली. पुलिसांनी वेळार येवन हे प्रकरण नियंत्रणांत हाडपाचो यत्न केलो.
ह्या प्रकरणाक लागून ग्रामसभेंत बोवाळ जालो. सरपंच चिमुलकार हांणी ग्रामसभा बंद उडोवन बोवाळाचेर नियंत्रण मेळयलें.
मजगतीं, इनासियो फर्नांडीस हांणी हे विशीं पुलिशेंत कागाळ दाखल केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
