भांगरभूंय | प्रतिनिधी
फोंडें: बोणबाग- बेतोड्यां गांवांत गवे परत दिसपाक लागल्यात. ताका लागून हांगा भंयाचें वातावरण निर्माण जालां. १२ ऑक्टोबराक गव्यान मंगल शांताराम गावडे हे बायलेचेर हल्लो केल्ल्यान तिका मरण आयिल्लें. ताका लागून ह्या वाठारांतल्या लोकांक धोको निर्माण जाला. देखून रान खात्यान लोक वस्तींत घुसपी गव्यांक धांवडावपाची मागणी थळावे लोक करतात.
बोणबाग गांवांत कालच्यान गवे घुसतना दिसतात. सांजेवेळार आनी सकाळीं गवे दिसूंक लागल्यात. गव्यान लोकवस्तींत येवन एके बायलेचेर हल्लो करून तिका मारिल्ली. उपरांत ग्रामस्थांनी रान खात्याच्या अधिकार्यां वांगडा बसका घेवन गव्यांक धांवडावपाचो तोडगो काडपाची मागणी केल्ली. ते प्रमाण रान खात्या वतीन सुमार ६००- ७०० मिटर लांब खड्डो खणला. मात खड्डो खणिल्लो वाठार सोडून गवे हेर मार्गान गांवांत प्रवेश करपाक लागल्यात.
सदानंद गावडे ह्या थळाव्यान दिल्ले म्हायती प्रमाण, गवे परत गांवांनी घुसपाक लागल्यात. ऑक्टोबर म्हयन्यांत जाल्ली घडणूक ताजी आसतना गवे गांवांनी परत आयिल्ल्यान लोकां मदीं भंयाचें वातावरण पातळ्ळां. सकाळीं आनी सांजेवेळार गवे गांवांत आशिल्ल्या गजानन देवळाच्या वाठारांत दिसपाक लागल्यात. थंयच लागसारा मुळावें विद्यालय आशिल्ल्यान विद्यार्थ्यांकूय धोको निर्माण जाला. रान खात्यान गव्यांक धांवडावपाचे यत्न करचे अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
