भांगरभूंय | प्रतिनिधी
पणजीः रायटर आनी फायटर म्हूण कोंकणी समाज जांका वळखतात अश्या ज्ञानपीठ पुरस्कारान सन्मानीत पद्मभूषण रवीन्द्र केळेकार हांचें जल्मशती वर्स चालू आसा. 7 मार्च 2024 साकून आरंभ जाल्ल्या आनी 7 मार्च 2025 मेरेन चलपी ह्या तांच्या जल्मशती वर्साचे आठ म्हयने उलगल्यात. पूण ह्या काळांत खंयचेच संस्थेन ताची फावो तशी दखल घेतिल्ली दिसना आनी फुडल्या चार म्हयन्यांत घेवपाचीं चिन्नाय झळकनात. अश्या वेळार आंतरराष्ट्रीय भारतीय चित्रपट महोत्सव म्हळ्यार इफ्फीच्या 55 वे आवृतींत रवीन्द्र केळेकार हांचेर तयार केल्ल्या म्हायतीपटाचो प्रिमियर जाता ही गजाल गोंयकारांक व्हडा अभिमानाची आनी चित्रपटाचे जागतीक माचयेर जाल्लो रवीन्द्र केळेकारांचो सन्मान अशें म्हणचे पडटलें.
ह्या म्हायतीपटा विशीं जाणून घेवपा पासत ताचे लेखक, दिग्दर्शक आनी निर्माते दिलीप बोरकार हांचे कडेन संपर्क केलो तेन्ना तांका हे विशीं जावंक जाय तितली खोशी जाल्ली दिसली ना. ते विशीं विचारतकच तांणी सांगलें, आपणें हो म्हायतीपट भारतीय पनोरमा पासत तयार केल्लो आनी तातूंत प्रवेशिकाय सादर केल्ली. पूण तातूंत ताची निवड जावंक नाशिल्ल्यान गोंय विभागांत तो सादर करचो पडलो. गोंय विभागांत कोंकणींतल्यान 25 प्रवेशिका गेल्ल्यो तातूंतल्यान 14 प्रवेशिकांची परिक्षकांनी निवड केली आनी तातूंत ‘जीवनयोगीः रवीन्द्र केळेकार’ ह्या म्हायतीपटाचो आसपाव आसा. ही तशी खोशयेची आनी अभिमानाची गजाल खरी पूण भारतीय पॅनोरमांत जर निवड जाल्ली जाल्यार चड खोस जावपाची. आतां दुदाची तान ताकाचेर भागयल्ल्या वरी दिसता.
रवीन्द्र केळेकार हांणी खंय तरी बरयलां, आपल्याक आनंदयात्री वा गांधीवादी विचारवंत बी असलीं बिरुदां लावचे परस ‘जीवनयोगी’ म्हणिल्लें आवडटलें. तेच पासत ह्या म्हायतीपटाक ‘जीवनयोगीः रवीन्द्र केळेकार’ अशें नांव दिलां म्हणपाचें दिग्दर्शक आनी निर्माते दिलीप बोरकार हांणी सांगलें.
रवीन्द्र केळेकार हांचेर एक सर्वांगसुंदर म्हायतीपट जावचो आनी तांच्या सांगाताक वावुरिल्ल्या तांच्या सांगात्यांच्या तोंडांतल्यान तांचें जीवनचरित्र फुडले पिळगे मेरेन पावचें हे नदरेन दिलीप बोरकार फाटलीं वीस वर्सां ह्या प्रकल्पाचेर काम करीत आयल्यात. त्या पासत तांणी उत्तम दर्जाचो आधुनीक कॅमेरो घेतिल्लो आनी संद मेळटा तेन्ना वेगवेगळ्या लोकांच्यो मुलाखती घेताले. तातूंत नामनेचे हिन्दी लेखक आनी समिक्षक नामवर सिंह, कवी आनी गीतकार गुलजार, मराठींतले नामनेचे कवी मंगेश पाडगांवकार आनी हेरांचो आसपाव आसा. रवीन्द्र केळेकार हांकां ज्ञानपीठ पुरस्कार भेटोवपाच्या सुवाळ्या वांगडाच तांच्या महानिर्वाणा वयलें तांणी करून दवरिल्लें चित्रिकरणूय तांणी ह्या म्हायतीपटांत घेतलां. तातूंत त्या काळार रवीन्द्रबाबांचे अंतयात्रे वेळार वेगवेगळ्या मळा वयल्या मानेस्तांनी उक्तायिल्ल्यो भावनाय आस्पावन घेतल्यात.
रवीन्द्र केळेकार हांच्या जल्मशताब्दी वर्साच्या काळांत जावपी इफ्फींत म्हायतीपटाचो आस्पाव जावचो हे नदरेन फाटलें वर्सभर ह्या म्हायतीपटाच्या निर्मितीचो वावर दिलीप बोरकार हांणी आरंभ केलो. चित्रपट मळा वयले एक दिग्गज साईनाथ परब हांचे मुखार तांणी हो प्रकल्प दवरलो. साईनाथ परब हे रवीन्द्र केळेकारांचे भक्त. तांकां ह्या म्हायतीपटाच्या निर्मितीक लागपी अर्थीक अडचण समजली तरी तांणी फक्त रवीन्द्रबाब केळेकार हांच्या आदराक आनी मोगाक लागून ह्या वावराक खांद मारलो. पयशे येतात तेन्ना येता म्हणत तांणी हो प्रकल्प खूब बारीकसाणीन उच्च दर्जाचें तंत्रज्ञान वापरून वेळा भितर तयार केलो जाका लागून इफ्फींत प्रवेशिका वेळार दिवप शक्य जालें.
ह्या म्हायतीपटाचे छायाचित्रण आनी संकलन साईनाथ परब हांणी केलां जाल्यार संगीत मुकेश घाटवळ हांचें आसा. संकल्प परब हे ध्वनी मुद्रक जाल्यार मानसी धाऊस्कार हांणी निर्मिती पालव दिला. उमेश मनोहरराय सरदेसाय हांणी ह्या कोंकणी म्हायतीपटाक अचूक इग्लीश सबटायटल तयार केल्यात.
दिलीप बोरकार कम्युनिकेशन्स ह्या बॅनरा खाला तयार जाल्या ह्या म्हायतीपटाचे सहनिर्माते कळंगूट मतदारसंघांतले आमदार आनी आदले मंत्री मायकल लोबो आसात. ह्या म्हायतीपटाचो प्रिमियर 25 नोव्हेंबर 2024 ह्या दिसा इफ्फीचे 55 वे आवृत्तींत पणजेच्या आयनॉक्स-3 पड्ड्याचेर दनपरां 12 वरांचेर जातलो जाल्यार 27 नोव्हेंबर दिसा मडगांवच्या आयनॉक्स-3 पड्ड्याचेर सांजवेऴां 4.30 चेर तो पर्थून दाखयतले. इफ्फींत प्रिमियर जाल्या उपरांत ह्या म्हायतीपटाचें सादरीकरण जानेवारी 2025 ते 7 मार्च 2025 ह्या काळांत गोंयभर जातलें तशेंच गोंयच्या उच्च माध्यमीक विद्यालयां आनी महाविद्यालयांनी विद्यार्थ्यांपासत दाखोवप जातलें अशें दिलीप बोरकार हांणी ह्या वेळार सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
