भांगरभूंय | प्रतिनिधी
आयज ‘ए आय’ हीं दोन उतरां संवसारार पसरल्यांत. जावं भुरगो जावं नेणटो दरेकल्यान हीं उतरां आयकल्यांत. ह्या दिसांनी खुबशे परिसंवाद आयकल्ले, सगळ्यांत एकूच सूर आयकूंक आयलो, तो म्हणल्यार हें ‘ ए आय आमचे दुस्मान व्हय? तो आमचें अस्तित्व नष्ट करचो ना मूं? ” ए आय ” म्हणल्यार राकेस? ” तो मनश्यांची बुदवंतकाय काबार करतलो. एक दीस “ए आय ” आपूण जावन मनशाक कुशीक काडून मनशाची सुवात घेतलो. फुडारांत घडये तोच कवी बाकीबाब तोच लेखक रवींद्रबाब आनी तोच गायक अभिषेकी बुवा जावं येता. अशे जायते नकारात्मक विचार आयकूंक येवपाक लागल्यांत. सगळ्यां सुवातेर ताचे विशीं भिरांत पातळावपाक सुरवात जाल्या. ज्या लोकांक ताचें फूल फॉर्म खबर ना. ते लोक माचयेर रावन लोकां मदीं अविश्वास पसरायतात.
हें आयकून म्हज्या सारकेल्याक दिसलें की, ए आय विशयाचेर बरोवचे दिसलें. खऱ्या अर्थान एक सकारात्मक विचार लोकां मदीं पावोवपाक जाय. म्हणूनच हो लेख बरोवपाक हातांत घेतलो. तर सगळ्यांत पयलीं हो ए आय म्हूण कितें हें प्रणाली हें जाणून घेवया. आर्टीफिशियल इंटेलिजेन्स म्हणल्यार असैमीक बुद्धिमत्ताय. जाका आमी कृत्रिम बुद्धिमत्ता, वा उश्णीं बुदवंतकाय म्हणूया. जे लोक ह्या विशयाचेर उलयतात. ज्यांचो ह्या विशयांचेर अभ्यास आसा. तो वयले वरचो अशें
म्हणल्यार हांव चुकत व्हय? अशें सगलेच न्हय तर कांय वेंचीक लोक जन सामान्यां मदीं भिरांतय घालतात. अश्या वेळार एक सकारात्मक विचार मांडपा खातीर मुखार सरपाक जाय.
तर सगळ्यांत पयलीं आमी हें ” ए आय ” प्रणाली म्हणल्यार कितें तें समजून घेवया. ” ए आय ” आर्टीफिशियल इंटेलिजेन्स म्हणल्यार अशें हें अशें एक तंत्रज्ञान, जें वापरून एक संगणक अशीं कामां करूंक शकता व्हय? जीं करपाक सादारण मनशाक करपाक मात्सो कळाव लागतलो. हें तंत्र वापरून संगणक पळोवपाक, आयकुवपाक, समजुवपाक शकता. तशेंच जी माहिती आनी तपशील दिला ताचें विश्लेशण करपाची तांक दवरता. हें करतना संगणक मनशाक उपदेश वा सुचोवण्यो दिवपाक लेगीत शकता. अशें तंत्र पयलीं नासलें काय कितें?
णवदाच्या दशकांत, जेन्ना पयलेच खेपे संगणक बँकांनी आयलो, सगळे कडेन असोच सूर गायताले, आतां नोकऱ्यो काबार जातल्यो. लोक बेकार जावन घरा बसतले. पूण घडलें भलतेंच. जसो- तसो काळ मुखार सरलो. तशे-तशे जायत्यो नव्यो वांटो उगडल्यो. देख दिवन सांगचेंच जाल्यार जशें शॅर बाजार घरा कडल्यान चलोवपाक मेळटा, म्हणून जायते लोक शॅर दलाल जावपाक शकले. हें विसरूं नज. घरा बसून बँक खातें तपासप, तें चलोवपा सारकेय प्रकार सुरु जाले. बँकांनी नोकऱ्यो वाडल्यो. पयलीं आशिल्लें ताचे परसय चड मनीस कामांक जाय पडले. आयज बँकांनी संगणक ना जाल्यार आमीच बेजार जातात.
आतां दुसरी गजाल रोबोट वा यंत्र मानव. हो आयल्यार लोकांक कामावयल्यान काडून उडयतले अशें एक चित्र समाजांत तयार केल्लें. पूण जालें भलतेंच, आयज यंत्रमानव खंय ना? तो सांगचो. आयज लोक हातान केल्ल्या वस्तूं परस यंत्रांत केल्ल्यो वस्तूं सुरक्षीत मानतात. तशेंच ह्या यंत्रांनी जाय त्यो नोकऱ्यो आनी धंदे अस्तित्वांत हाडले. हांगा एक मुद्दाम सांगचेंशें दिसता, पयलीं तेंपार सिनेमा काडटना हिरोच्या भशेन दिसपी मनीस ताची सगळीं धाडसी कामां करताले , केन्ना – केन्नाय तांका अपघात जावन मरण देखून येतालें. पूण आयज यंत्रा खातीर तशें कांय घडना आनी खूब अशें सुरक्षित वातावरण तयार जालां. अशें म्हाका खात्रेन दिसता.
आतां आमी ” ए आय” विशीं एका वेगळ्या नदरेन पळोवया. “ए आय ” कडल्यान साहित्यकारांक व्हड संकट आसा. असो एक विचार लोक मांडटात. हालींच एक दिवाळी अंक “ए आय” च्या माध्यमांतल्यान तयार करून प्रकाशीत केलो. तातूंत कांय नवल ना ! कारण “ए आय ” तुमच्या आमच्या संगणकाचेर उपलब्ध आसा. आनी जर आमकां जाय जाल्यार माथाळो दिल्यार तोच एक कथा घडोवन दितलो, पूण ती कलात्मक आसतली म्हणूं नज. पुणून ह्याच ” ए आय ” चो उपेग कथा संगणकांत टायप करपाक बेस बऱ्या पद्धतीन करूं येता. हालींसराक आमी पळयतात, जाणटें लोक संगणकांचेर टायप करपाक मात्शें फाटीं रावतात. तांणी हाचो उपेग करून आपल्याक जाय तें टायप करूं येता.
“ए आय” वेगवेगळ्यां भाशांनी अणकार करपाक शकता. देखून आमी जगांतलीं खंयचींय पुस्तकां सहज वाचूंक शकतले. अशें तरेन आमच्या गिन्यानांत वाड जातली. हांगा एक गजाल लक्ष्यांत घेवपाची, हें अनुवादन “एआय” स्वता जावन करपाचें ना, ताका पयलीं तसो शिकोवचो पडटलो, जाका आमी प्रोग्रामिंग अशें म्हणटात. तें करपाक त्या – त्या भाशेचे जाणकार जाय पडटलें. हांगा तयार जाल्यो नोकऱ्यो. बऱ्या साहित्यकारांक केन्नाच भंय ना! मागीर तोच ” ए आय” चो आसूं.
“ए आय” हो मनशांनी घडयला म्हूण एक याद दवरपाक जाय, तो केन्नाच मनश्यां परसय व्हड जावंक शकना. आनीट जावंचोय ना. हालींचीं भुरगीं “ए आय” वापरून आपलो अभ्यास करतात. अशें वातावरण जालां. हांगा मातशें वेगळेपणान पळयल्यार दिसता कि, तांका “ए आय” आपलो इश्ट म्हूण कसो वापरप, हें बेस बरें खबर आसता. ह्या वागणुकेक सारकी दिशा दाखोवप सामकें गरजेचें. देखून तांका “ए आय” वापरून आपलें गिन्यान वाडोवप, तशेंच हेर विशय जाणून घेवप हांचेर नदर आसपाक जाय. फुडारांत तींच भुरगीं एक “ए आय” तज्ञ जावूं येता.
म्हज्या मतान आतां वेळ आयला, आमी “ए आय”क एक राकेस न्हय तर एक सेवक वा इश्ट म्हूण पळोवपाचो. ताचो चडांत चड वापर करप आनी वापरून घेवप हातूंत फरक कळपाक जाय आनी आमकां “ए आय”न वापरून घेवचे पयलीं आमी ताचो बरो वापर करपाक जाय. खरेंच, आमी “ए आय”क भिवपाची गरज आसा? ना ! “ए आय”कडल्यान आमकां भंय ना आनी आमकां भिवपाची गरजूय ना !
संत ज्ञानेश्वर हांणी पसायदान सांगलां, “दुरितांचे तिमिर जावो, विश्वस्वधर्म सूर्ये पाहो” मनाचो काळोख पयस वचूं. आनी गिन्यान रुपी उजवाड सगळ्याक पसरूं. हें तांची उतरां आयचे घडयेक ज्युस्त उपकारा पडटात म्हणल्यार मातूय अतिताय जावंची ना.
भूषण शिरवयकार
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
