भांगरभूंय | प्रतिनिधी
भाजपा सयत शिंदे गट, अजित पवार गटाचेर मतदार खूश
मुंबय, खबरां संस्था ः महाराष्ट्र विधानसभे खातीर २० नोव्हेंबराक 288 जाग्यांचेर मतदान जालें. 2019 वर्साचे तुळेंत हे खेपे 4 टक्क्यांनी चड मतदान जालें. आयज सकाळीं 8 वरां सावन मतांची मेजणी सुरू आसा. ती चड करून रातीं १२ मेरेन चलपाची शक्यताय आसा. पयल्या दोन वरांत महायुती आनी महाविकास आघाडी हांचे मदीं सर्त जाली, पूण कांय वेळा उपरांत भाजपा महायुतीन आघाडी घेतली. आतांच्या आंकडेवारी प्रमाण महाआघाडीक खूब फाटीं सोडून महायुती बरीच फुडें गेल्या.
मतांची मेजणी सकाळीं ८ वरां सावन सुरु जाली. पयलो निकाल सुमार १२ वरांचेर जाहीर जालो. तांतूत वडाळा मतदारसंघांत भाजपाचे कालिदास कोळंबकर २४,९७३ मतांनी जैतिवंत जाले. तांणी फाटोफाट णववे फावटी जैत जोडून विक्रम केलो. माहिमांत राज ठाकरे हांचे पूत अमित हांकां हार घेवची पडली. शिंदे गट, अजित पवार गट मूळ पक्ष सोडून गेल्ले. तांचेर खर टिका जाताली. मात, महाराष्ट्रांतले लोक तांचे वाटेन राविल्ल्याचें दिसलें. तांचे चडशे उमेदवार वेंचून आयल्यात.
वेंचणुकेंत सिंधुदुर्गाच्या लोकांनी महायुती वटेन मतदान केल्ल्याचे दिसून आयलें. सिंधुदुर्गांतल्या सावंतवाडी, कुडाळ आनी कणकवली ह्या तीन मतदारसंघांतल्या लोकांनी महाविकास आघाडीक न्हयकारून महायुती पक्षाक तेंको दिलो.
सावंतवाडींत राजन तेली हांकां हारोवन शिवसेनेच्या (शिंदे गट) दीपक केसरकर हांणी ८०,३८९ मतां मेळोवन जैत मेळयले. जाल्यार कुडाळ- मालवणांत शिंदे शिवसेनेचे निलेश राणे हांकां ८३४४ मतांनी जैत मेळ्ळें. कणकवली मतदारसंघांतल्यान भाजपाचे नितेश राणे हांकां 1,07,174 मतांच्या व्हड फरकान जैत मेळ्ळें. तांणी शिवसेनेचे संदेश पारकार हांकां 57601 मतांनी हारयले.
महाराष्ट्राचे मुख्यमंत्री कोण जातले हांचे कडेन आतां सगल्यांचे लक्ष आसा. मात जाणकाराच्या मतान देवेंद्र फडणवीस मुख्यमंत्री जातले.
मुंबयचे निकाल
मलबार हिल – मंगलप्रभात लोढा (भाजप)
बोरिवली – संजय उपाध्याय (भाजप)
वडाळा – कालिदास कोळंबकर (भाजप)
कुलाबा – राहुल नार्वेकर (भाजप)
वांद्रे पश्चिम – आशिष शेलार (भाजप)
अंधेरी पूर्व – मुरजी पटेल (भाजप)
कांदिवली – अतुल भातखळकर (भाजप)
अणशुक्तीनगर – सना मलिक (अजित पवार गट)
माहीम – महेश सावंत (ठाकरे गट)
दहिसर – मनीषा चौधरी (भाजप)
वरळी – आदित्य ठाकरे (ठाकरे गट)
शिवडी – अजय चौधरी (ठाकरे गट)
विक्रोळी – सुनील राऊत (ठाकरे गट)
शिवाजीनगर मानखुर्द – अबू आझमी (समाजवादी पक्ष)
कु्र्ला – मंगेश कुडाळकर (शिंदे गट)
मुलुंड – मिहीर कोटेचा (भाजप)
भायखळा – मनोज जामसुतकर (ठाकरे गट)
चेंबूर – तुकाराम काते (शिंदे गट)
कलिना – संजय पोतनीस (ठाकरे गट)
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
