‘‘घरत गणपती” हो भारतीय परंपरा, संस्कृताय मुखार व्हरपाचो यत्न

भांगरभूंय | प्रतिनिधी

पणजी ः दिग्दर्शक नवज्योत नरेंद्र बांदिवडेकार हांचें मराठी फिल्म ‘घरत गणपती’ हें समकालीन भारतांत शेणत वचपी भारतीय परंपरा, संस्कृताय आनी मुल्यां मुखार व्हरपाचो प्रामाणीक यत्न. आयच्या संवसारांत संयुक्त कुटुंबाची संकल्पनाय उणी जायत आसा. इफ्फींत उत्कृश्ट पदार्पण दिग्दर्शक पुरस्कार मेळोवपा खातीर सर्त करपी ह्या चित्रपट निर्मात्यान सांगलें की ताचो चित्रपट वेगवेगळ्या मजेन भरिल्ल्या तशेंच अराजक परिस्थितींतल्यान सगळ्या कुटुंबांतल्या वांगड्या मदल्या आंतर- वैयक्तीक गतीशास्त्राचो अणभव दिता. आयज भारताच्या 55व्या आंतरराष्ट्रीय चित्रपट महोत्सवांत पीआयबीन आयोजीत केल्ले पत्रकार परिशदेंत ते उलयताले.

‘घरत गणपती’ चे संगीत दिग्दर्शक संकेत साने हांणी सांगलें की, ह्या सिनेमाच्या संगीतातल्यान प्रेक्षकांक भारतीय संस्कृताये कडेन जोडला. दर एका भारतीय काळजाकडेन भावनीक नाते जोडला.
हो सिनेमा महाराष्ट्राच्या सैमीक कोंकण दर्यादेगेर आदारीत आसा. पूण ह्या सिनेमांत दाखयल्लें पूर्वजांचे महाराष्ट्रीय घर केरळांत आसा. ह्या संदर्भांत बांदिवडेकार हांणी म्हणलें, “सगल्या भारतांत सैमीक सोबीतकाय भरपूर प्रमाणांत आसा, ताचे खातीर आमकां भारता भायर वचपाची गरज ना.”
‘घरत गणपती’ ची कार्यकारी सहनिर्माती अश्विनी परांजपे हांणी ही काणी आयकून पयल्याच दिसा ह्या सिनेमा विशीं खात्री जाली अशें सांगलें. ‘घरत गणपती’ फिल्म मान्यताय, विकसीत जावपी परंपरा आनी भारतीय कुटुंबांतल्या गुंतागुंतीचे बंधन हाताळता. ‘घरत गणपती’ हो सिनेमा उत्सवा वेळार हांसो आनी दुकां मदीं मोग, अस्मिताय, संस्कृतीक भावना कश्यो फुलतात हाची वळख करून दिता.
पटकथेंत बळिश्ट बायलां पात्रां आसात अशेंय ह्या सिनेमाच्या दिग्दर्शकान नदरेक हाडलां. ह्या सिनेमांत गणपती महोत्सवांत महाराष्ट्र कुटुंबा कडेन रावपाक कोंकणात येवपी उत्तर भारतीय चलयेचें चित्रण आसा. ह्या सिनेमाच्या कलाकारां मदीं निकिता दत्ता, भूषण प्रधान, अजिंक्य देव, अश्विनी भावे, संजय मोने, शुभांगी लाटकार आनी शुभांगी गोखले हांचो आस्पाव आसा.