भांगरभूंय | प्रतिनिधी
पुजा नायक, श्रृती प्रभुगांवकार, योगेश शेणवी कुंकळीकार, विषया गावडे आनी सोनिया आचारी हांचो आस्पाव
भांगरभूंय | प्रतिनिधी
पणजी/ फोंडें/ मडगांव : सरकारी नोकरेचें हांयस दाखोवन कोट्यांनी रुपयांची तोपी घाल्ल्या पुजा नायक, श्रृती प्रभुगांवकार, योगेश शेणवी कुंकळीकार, विषया गावडे आनी सोनिया आचारी हांकां सशर्त जामीन मेळ्ळा.
पुजा नायकाक फटींगपणाच्या सगळ्या प्रकरणांत जामीन मेळ्ळा. तिका पणजी पयलें वर्ग न्यायालयान 30 हजार रुपया दंड आनी हेर अटीं सयत सशर्त जामीन मंजूर केला.
आयज मेरेन सरकारी नोकरेचें हांयस दाखोवन लोकांक फटोवपाचीं जायतीं प्रकरणां मुखार आयलीं. मात पुजा नायकान केल्ल्या फटींगपणाचें प्रकरण पयलेंच उक्ताडार आयिल्लें. उपरांत तिच्यो गाडयो आनी मालमत्ता जप्त केली. चवकशेक सुरवात जाली. पुजा नायक हिचे आड दिवचले, पर्वरी तशेंच म्हाड्डोळ पुलीस स्टेशनांत फटयिल्ल्याचे गुन्यांव नोंद आसात.
मेळिल्ले म्हायती प्रमाण पुजा नायक उर्फ रूपा पालकार ही 2012- 13 त एका प्रादेशीक पक्षाच्या पणजेच्या कार्यालयांत काम करताली. थंयचे वळखीचो फायदो घेवन तिणें त्या काळांत 10 जाणांक सरकारी दिल्ल्याची म्हायती मुखार आयिल्ली. 2012 ते 2024 ह्या बारा वर्सांच्या काळांत तिणें सरकारी नोकरी दिवपाचें हांयस दाखोवन सुमार दोन कोटी रुपयांक तोपी घाल्ल्याचो अदमास आसा.
हे पयलीं म्हाड्डोळ आनी दिवचल पुलिसांनी तिका फटोवपाच्या प्रकरणांत अटक केल्ली. उपरांत तिका पर्वरी पुलिसांनी अटक केली. पुजा नायकाच्या प्रकरणांत दुबावीत आशिल्लो श्रीधर सतरकार हांणी कांय दिसां आदीं कुंकळ्ळें- म्हाड्डोळ वाठारांत गोळ घेवन आत्महत्त्या केल्ल्याचें उक्ताडार आयिल्लें. सतरकाराक आत्महत्त्या करपाक प्रवृत्त केल्ल्याचो आरोपा म्हाड्डोळ पुलिसांनी पुजा आड दाखल केल्लो.
पुजाच्या घरार धाड घालून म्हाड्डोळ पुलिसांनी सुमार 50 जाणांचे अर्ज जप्त केले. तिणें एका कागाळदाराच्या पुताक येरादारी खात्यांत कनिश्ठ लिपिकाची नोकरी दिवपाचें सांगून तांचे कडल्यान 4 लाख रुपया घेतले. दुसर्या पुताक भौशीक बांदकाम खात्यांत (पीडब्ल्यूडी) अभियंत्याची नोकरी दिवपाचें सांगून 10 लाख रुपया घेतिल्ले, अशी कागाळ आसा. तिची दखल घेवन म्हाड्डोळ पुलिसांनी पुजाक अटक केल्ली.
सरकारी नोकरी फटवणूक प्रकरणांत फोंडें पुलिसांनी अटक केल्ली श्रुती प्रभुगांवकार हिचो जामिना खातीर केल्लो अर्ज न्यायालयान मंजूर केला. तशेंच योगेश शेणवी कुंकळीकार ह्या शिक्षकाचो लेगीत जामिना खातीर केल्लो अर्ज न्यायालयान मंजूर केला.
फोंडें वाठारांत खूब जाणांक सरकारी नोकरी दिवपाचें हांयस दाखोवन योगेश शेणवी कुंकळीकार हाणें सुमार 1 कोटी 20 लाख रुपया घेतिल्ले. पूण सरकारी नोकरी मेळूंक नाशिल्ल्यान एका पालकान फोंडें पुलीस स्टेशनार कुंकळीकार हाचे आड कागाळ दाखल केल्ली. ते प्रमाण पुलिसांनी ताका अटक केले उपरांत श्रुती प्रभुगांवकार हिचें नांव उजवाडाक आयिल्लें. ताका लागून फोंडें पुलिसांनी श्रुती प्रभुगांवकार हिका अटक केल्ली.
फाटल्या कांय दिसां सावन श्रुती प्रभुगांवकार हिका पुलीस कोठडेंत दवरपाचो आदेश दिल्लो. बिरेस्तारा रिमांड सोंपले उपरांत पुलिसांनी तिका न्यायालयांत हाजीर केली, तेन्ना न्यायाधिशान श्रुती प्रभुगांवकार हिचो जामिना खातीर केल्लो अर्ज मंजूर केलो. तशेंच योगेश शेणवी कुंकळीकार हाणें जामिना खातीर केल्लो अर्ज मंजूर केलो. हे आदीं न्यायालयान योगेश शेणवी कुंकळीकार हाका न्यायालयीन कोठडेंत दवरपाचो आदेश दिल्लो.
नौदळांत नोकरी दिवपाचें हांयस दाखोवन 16 लाखांक फटोवपी दुबावीत विषया गावडे आनी सोनिया उर्फ रोशन आचारी हांकां मडगांव न्यायालया कडल्यान सशर्त जामीन मंजूर केला. तपास कामांत आदार करप, 50 हजार रुपयांची वैयक्तीक हमी आनी हेर अटी न्यायालयान घातल्यात.
नागमोडें नावेली रावपी सुनील बोरकार हांणी मडगांव पुलिशेंत कागाळ दाखल केल्ली. ते प्रमाम दुबावीत विशया विष्णू गावडे (53. मूळ आचारीवाडो, सदाशिवगड, कारवार) हिणें बोरकार हाच्या भावाक नौदळांत अधिकारी पदा वयली नोकरी दिवपाचें हांयस दाखयलें आनी ते खातीर पयशांची मागणी केली. 2020 त 20 जानेवारी आनी 30 जून अशे दोन खेपे मडगांवां दोन कडेन मेळून 16,12,500 रुपया बोरकार हांणी दुबावितांक पयशे दिले. पयशे दिले उपरांतूय दुबावितांनी नोकरी दिवंक ना तशेंच घेतिल्ले पयशेय परतून दिवंक ना.
ह्या प्रकरणांत मडगांव पुलीस स्टेशनार गुन्यांव नोंद केले उपरांत 14 नोव्हेंबराक मडगांव पुलिसांनी दुबावितांक अटक केली. तांकां न्यायालयांत हाजीर केले उपरांत तांकां पांच दिसांची पुलीस कोठडी फर्मायली. ते उपरांत कोठडेंत वाड केल्ली. मायणा कुडतरी पुलीस स्टेशनार दुबावितां आड नोंद आसिल्ल्या 27 लाख रुपयांच्या अर्थीक फटवणुकेच्या प्रकरणांत लेगीत चवकशी आनी तपास जातलो, अशें पुलीस अधिक्षक सुनिता सावंत हांणी हे आदीं सांगलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
