भांगरभूंय | प्रतिनिधी
रस्तो सुरक्षा मंडळ बसकेंत प्रस्तावाचेर चर्चा
पणजी : अपघात पिडेस्तांचे लुकसाण भरपाय किमतीची मर्यादा २ लाख रूपयां वेल्यान १० लाख रूपया करपाचो प्रस्ताव आसा. हे विशीं रस्तो सुरक्षा मंडळाचे बसकेंत चर्चा जाली. येरादारी मंत्री मॉवीन गुदिन्हो हांचे अध्यक्षते खाला जाल्ले बसकेक येरादारी, भौशीक बांदकाम, पुलीस खात्याचे अधिकारी आनी हेर वांगडी हजर आशिल्ले.
अपघातांत मरण आयल्यार २ लाख रूपया लुकसाण भरपाय दिवपाची तरतूद येवजणेंत आसा. ही रक्कम आतां १० लाख रूपया करपाचो प्रस्ताव आसा. गंभीर जखमी, किरकोळ दुखापत जाल्ल्यांकूय अर्थीक मजत दिवपाची तरतूद आसा. बसकेंत अपघातांचीं कारणां आनी उपया येवजणेचेर चर्चा जाल्ल्याची म्हायती अधिकार्यांनी दिली. अपघातांच्या कारणांचो सोद घेवन ताचेर उपाय सुचोवपाचे निर्देश विवीध खात्यांक दिले. निश्काळजीपणान वाहन चलोवप, सोरो पियेवन वाहन चालोवपा सयत नेम पाळिना, अशीं अपघातांचीं जायतीं कारणां आसात. सोरो पियेवन वाहन चलोवप हें अपघाताचें एक कारण. हाका लागून रातच्या वेळार पब्स आनी बार्राच्या वाठारांत अॅप टॅक्सीची वेवस्था आसपाक जाय. अपघात जाले उपरांत अपघातांचे सुवातेर रोखडीच १०८ ऍम्बुलन्स पावतली अशे उपाय काडपाचे निर्देश दिले.
रस्तो सुरक्षितताये खातीर तरणाट्यां सयत सगळ्या नागरिकां मदीं जागृताय करपाची गरज आसा. हाका लागून लघुपट, जिंगल्स तशेंच रस्तो सुरक्षा तखट्यांची गरज आसा. रस्ताद सुणीं आनी हेडगीं गोरवां ही लेगीत व्हड समस्या आसा. रस्त्यावेले ब्लॅक स्पॉट मार्च २०२५ मेरेन दुरुस्त करतले. ब्लॅक स्पॉट दुरूस्त करपा विशीं कार्यवाही करपाचे निर्देश भौशीक बांदकाम खात्याक दिल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
