भांगरभूंय | प्रतिनिधी
पणजी : सरकारी नोकरेचें हांयस दाखोवन कोट्यांनी रुपयांची तोपी घाल्ल्या पुजा नायकाक फटींगपणाच्या सगळ्या प्रकरणांत जामीन मेळ्ळा. तिका पणजी पयलें वर्ग न्यायालयान ३० हजार रुपया दंड आनी हेर अटीं सयत सशर्त जामीन मंजूर केला.
आयज मेरेन सरकारी नोकरेचें हांयस दाखोवन लोकांक फटोवपी जायतीं प्रकरणां मुखार आयलीं. मात पुजा नायकान केल्ल्या फटींगपणाचें प्रकरण पयलेंच उक्ताडार आयिल्लें. उपरांत तिच्यो गाडयो आनी मालमत्ता जप्त केली. चवकशेक सुरवात जाली. पुजा नायक हिचे आड दिवचले, पर्वरी तशेंच म्हाड्डोळ पुलीस स्टेशनांत फटयिल्ल्याचे गुन्यांव नोंद आसात.
मेळिल्ले म्हायती प्रमाण पुजा नायक उर्फ रूपा पालकार ही २०१२-१३ त एका प्रादेशीक पक्षाच्या पणजेच्या कार्यालयांत काम करताली. थंयचे वळखीच फायदो घेवन तिणें त्या काळांत धा जाणांक सरकारी दिल्ल्याची म्हायती मुखार आयिल्ली. २०१२ ते २०२४ ह्या बारा वर्सांच्या काळांत ताणें सरकारी नोकरी दिवपाचें हांयस दाखोवन सुमार दोन कोटी रुपयांची तोपी घाल्ल्याचो अदमास आसा.
ह्यान पयलीं म्हाड्डोळ, दिवचलच्या पुलिसांनी तिका फटोवपाच्या प्रकरणांत अटक केल्ली. उपरांत तिका पर्वरी पुलिसांनी अटक केली. पुजा नायकाच्या प्रकरणांत दुबावीत आशिल्लो श्रीधर सतरकार हांणी कांय दिसां आदीं कुंकळ्ळें- म्हाड्डोळ वाठारांत फास घेवन आत्महत्त्या केल्ल्याचें उक्ताडार आयिल्लें. सतरकाराक आत्महत्त्या करपाक प्रवृत्त केल्ल्याचो आरोपा म्हाड्डोळ पुलिसांनी पुजा आड दाखल केल्लो.
पुजाच्या घरार छापो घालून म्हाड्डोळ पुलिसांनी सुमार ५० जाणांचे अर्ज जप्त केले. तिणें एका कागाळदाराच्या पुताक येरादारी खात्यांत कनिश्ठ लिपिकाची नोकर दिवपाचें सांगून तांचे कडल्यान चार लाख रुपया घेतले. दुसर्या पुताक भौशीक बांदकाम खात्यांत (पीडब्ल्यूडी) अभियंत्याची नोकरी दिवपाचें सांगून धा लाख रुपया घेतिल्ले, अशी कागाळ आसा. तिची दखल घेवन म्हाड्डोळ पुलिसांनी पुजाक अटक केल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
