भांगरभूंय | प्रतिनिधी
धर्मगुरू, राजकी फुडाऱ्यां सयत हजारांनी भाविकांनी घेतलें दर्शन
भांगरभूंय । जॉन एम्. आल्फोंसो, कार्मेलीत,
पणजीः भाग्यवंत फ्रान्सीस शावियेराचे पवित्र कुडीच्या दर्शन सुवाळ्यांक काल बिरेस्तारा सावन सुरवात जाली. उक्तावणेच्या दबाजीक मीसाची येजमानकी दिल्ली म्हाधर्मप्रांताचे आर्चबिशप अनील कुटो हांणी चलयली.
आर्चबिशप फिलीप नेरी कार्डीनल फेर्रांव हांणी हाजीर आशिल्ल्या बिस्पांक आनी सगळ्यांक येवकार दिलो आनी, भाग्यवंत फ्रान्सीस शावियेराचे पवित्र कुडीचो दर्शन सुवाळो एक आत्मीक घडीत आसून, आमकां सगळ्यांक फायद्याक पडूं म्हण मागणें करूंक उलो मारलो.
“भाग्यवंत फ्रान्सीस शावियेराचे पवित्र कुडीचो दर्शन सुवाळो, न्हयच फकत कुडीचो उमो घेतल्यांक, भारताचे पवित्र सभेंक (चर्च) कुर्पेचो आनी नवसरणेचो काळ.” अशें आर्चबिशप कुटो हाणीं सांगलें. “आमचें जिवीत बदलूंक, ही आमकां एक याद. भाग्यवंत फ्रान्सीस शावियेरान जेजूचो अणभव मेळटच जिवीत बदल्लां.” अशें आर्चबिशप कुटो उलयले.
आर्चबिशप फिलीप नेरी कार्डीनल फेर्रांव (गोंय- दामांव म्हाधर्मप्रांताचे आर्चबिशप), बिस्प तियोदोर मास्कारेन्हास (दालतंगांज धर्मप्रांताचे बिस्प), बिस्प सिमियांव फेर्नांडीस (गोंय- दामांव म्हाधर्मप्रांताचे आदारी बिस्प), बिस्प जोजफ राजाराव (विजयवाडा धर्मप्रांत), बिस्प विसूवासम सेल्वाराज (पोर्ट ब्लेर धर्मप्रांताचे बिस्प), बिस्प आलेक्स डायस (पोर्ट ब्लेर धर्मप्रांताचे सेवेमेकळे बिस्प), बिस्प डॉमनीक : लुमोन (इम्फाल धर्मप्रांताचे सेवेमेकळे बिस्प), फा. जुजे रेमेदियस फेर्नांडीस (गोंय- दामांव म्हाधर्मप्रांताचे विगार जेराल), फा. आल्बर्ट नापोलितानो (पाप सायबाच्या दुताचे सचीव), मोन्सिनहोर जुवान पाबलो (दुताची कचेरी), फा. हेनरी फालकांव (पवित्र कुडीच्या दर्शन सुवाळ्याच्या समितीचे निमंत्रक), फा. पेद्रो रॉड्रिगीस, (जेजुयत संस्थेचे प्रांतिक वडील), फा. पात्रिसियो फेर्नांडीस (बाजिलिकेचे रॅक्टर), फा. रुजारियो ऑलिवेरा (से काथेद्रालाचे विगार), फा. नाझारेथ फेर्नांडीस (पिलार संस्थेचे सर्व- वडील) , कॅनन (फा.) आल्फ्रेड वाझ (अध्यक्ष, काथेद्राल चापटर- गोंय), डिकन स्लेटर आलेमांव, डिकन मॅलकम कुलासो आनी सुमार 600 पाद्रींनी सहबलिदानांत वांटो घेतलो.
भाग्यवंत फ्रान्सीस शावियेराचे आत्मीक यात्रेचेर नियाळ घेतना, आर्चबिशप अनील, हाणीं भाग्यवंत फ्रान्सीस शावियेर, शुभवर्तमान परगट करूक थांबनासतना वावुरलो म्हण सांगलें. देवाचें राज्य परगट करुंक, सैतानाचेर, पातकाचेर आनी मरणाचेर पासून जैत व्हरुंक जाय म्हण उगडास केलो. “आमी जेजूच्या संबंदांत वाड करून घेतात तेन्ना समाजाक रूच हाडटलें मीठ आनी वाट दाखयता तसली पण्टी जातात.” अशे आर्चबिशप कुटो हांणी शेवटाक सांगलें.
पवित्र पुस्तकाच्या केंद्राचे संचालक फा. मारीयानो डिकॉस्टा हाणीं सेवाधर्मीक सुत्रां सांबाळ्ळीं. गंवळीक विद्यामंदिराचे संचालक फा. कानडीडो फेर्नांडीस हाणीं सेवाधर्मीक मांडावळ केली. म्हाधर्मप्रांताचे कुलगुरू फा. रोमयो मोंतेरो हाणीं गायन- मंडळाचें फुडारपण केलें. फा. डानियेल पेरेरा आनी झीबा तियेगल हांणी वेळा- वेळार कळोवण्यो करून भक्तांक मार्गदर्शन दिलें. पवित्र कुडीच्या दर्शन सुवाळ्याच्या समितीचे निमंत्रक फा. हेंनरी फालकांव हांणी उपकाराचें उलोवप केंलें.
कूड पुरसांवान व्हेली
मिसा उपरांत भाग्यवंत फ्रान्सीस शावियेराची पवित्र कूड पुरसांव काडून बाजिलिकेंतल्यान सें काथेद्रालांत, 100 वादकांच्या संगीतान व्हेली. ह्या संगीत पंगडाचें फुडारपण फा. सायमन डिकुन्हा हाणीं केलें. पुरसांवांत वेग-वेगळ्या प्रतिनिधींनी, ब्रदर्स, मठवाश्यांनी, पाद्रींनी आनी बिस्पांनी वांटो घेतलो. पवित्र कूड से काथेद्रालांत दवरतच आर्चबिशप फिलीप नेरी कार्डीनल फेर्रांव हाणीं मागणें केल्लें. उपरांत हाजीर आशिल्ल्यांनी उमो घेतलो.
ह्या वेळार विरोधी पक्ष फुडारी युरी आलेमांव, कार्लोस फेरेरा, चर्चील आलेमांव हेवूय हाजीर आशिल्ले.
पांतेल्यांव फेर्नांडीस हाणीं बरयिल्ल्या ‘स्टोरीज इन स्लिवर- सेंट फ्रान्सीस झेवियर’ ह्या पुस्तकाचें विमोचन जालें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
