भांगरभूंय | प्रतिनिधी
सभापतीन स्पश्ट मत उक्तावपाचे घडणुकेक येवकार
पणजी: सभापती रमेश तवडकार हे मंत्री तशेंच सरकाराच्या कामगिरीचेर समाधानी नात. सरकारांतले कांय मंत्री तांकां आदराची वागणूक दिनात. आत्मसन्मान सांबाळपा खातीर तांणी आमदारकीचो राजिनामो दिवन परतून वेंचणूक लडोवपाची गरज आसा. राजिनामो दिवन काणकोण मतदारसंघांत वेंचणूक लडयत जाल्यार आम आदमी पक्ष तांकां तेंको दितलो अशें आम आदमी पक्षाचे सरचिटणीस फ्रान्सीस कुएलो हांणी सांगलें.
आम आदमी पक्षान पणजेंत पत्रकार परिशद घेतली. सरचिटणीस फ्रान्सीस कुएलो, रोहन नायक, सुनीत शिगणापूरकार आनी सर्फराज अंगलायसी पत्रकार परिशदेंत हाजीर आशिल्ले.
सभापती रमेश तवडकार हांणी हालींच एक मुलाखत दिल्ली. सरकार तशेंच मंत्र्यांच्या कामगिरीचेर आपूण समाधानी ना. कांय मंत्री सभापतीपदाचो मान राखना. भौशीक कार्यावळींनी लेगीत म्हजे आड अपमानास्पद उलोवपां केल्यांत. पक्षांतरा विशीं उलयतना नैतिकतेची मर्यादा सांबाळपाची गरज आसा, अशें मत तांणी मांडलें. भारतीय जनता पक्षांत आसतना लेगीत तांणी सत्य परिस्थिती मांडली. तांचे हे कृतीक आम आदमी पक्ष येवकार दिता. आत्मसन्मान आसा जाल्यार तांणी भारतीय जनता पक्षाचो राजिनामो दिवपाक जाय. राजिनामो दिवन तांणी काणकोणां वेंचणूक लडयत जाल्यार आम आदमी पक्ष तांकां तेंको दिवपाक तयार आसा. भारतीय जनता पक्षाचे सरकार सगल्या मळार अपेशी थारलां, असो आरोप तांणी केलो.
मंत्री गोविंद गावडेन राजिनामो दिवचो
वा मुख्यमंत्र्यांन तांचेर कारवाय करची
कला आनी संस्कृती खात्याचे मंत्री गोविंद गावडे हांचो आदलो कर्मचारी अनिकेत खांडोळकार नोकरे खातीर पयशे घेवपाच्या प्रकरणांत अटक जाल्या. ह्या प्रकरणाची खोलायेन चवकशी जावपाक जाय. नैतीक जापसालदारी घेवन मंत्री गोविंद गावडे हांणी राजिनामो दिवपाक जाय. तांणी राजिनामो दिलो ना जाल्यार मुख्यमंत्री डॉ. प्रमोद सावंत हांणी तांचेर कारवाय करपाक जाय, अशी मागणी युवा फांट्याचे मुखेली रोहन नायक हांणी केली. मंत्र्याच्या आदल्या कर्मचाऱ्याक अटक जावप ही गंभीर घडणूक आसा, अशें तांणी म्हणलें.
नोकरे खातीर पयशे दिवपाच्या घडणुकांची खोलायेन चवकशी जावपाक जाय. चवकशी पुराय जावचे पयलींच पुलीस म्हासंचालक पत्रकार परिशद घेवन मंत्र्यांचो थेट संबंध नाशिल्ल्याचें जाहीर करतात. पुलीस म्हासंचालकांक पत्रकार परिशद घेवपाची गरज कित्याक पडली? असो प्रस्न आम आदमी पक्षान केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
