भांगरभूंय | प्रतिनिधी
सांगें: राष्ट्रीयकृत बँकेच्या कुडचडें कर्मचाऱ्यां कडल्यान ज्येश्ठ नागरिकांक कोट्यांनी रुपयांची तोपी घालपाचो धपको दिवपी प्रकार उक्तडार आयला. ह्या प्रकरणांत पुलिशेंत कागाळ दाखल केल्या. गुन्यांव दाखल करपाचे मागणे खातीर पिडीत ज्येश्ठ नागरीक आनी तांचे सोयरे कुडचडें पुलीस स्टेशना मुखार उसरां मेरेन बशिल्ले.
ज्येश्ठ नागरिकांक बँकींग वेव्हारांची सेवा दिवपा खातीर नेमिल्ले एके बायल कर्मचाऱ्यांन खूबशा ज्येश्ठ नागरिकांची फटवणूक केल्या. तिणें पिडीत ज्येश्ठ बायलांचो विस्वास संपादन करून तांचे मोबायल सीमकार्ड मेळयले. उपरांत तांची मुजत ठेवींतल्यान लाखांनी रुपयांची रक्कम काडली. तशेंच तांच्या बँक लॉकरांतल्यान भांगराच्यो वस्ती लेगीत चोरल्यो.
ह्या प्रकरणांत बायले आड कुडचडें पुलीस स्टेशनार कागाळ दाखल केल्या. पूण पुलिसांनी सुरवातेक कागाळ दाखल करपाक कळाव केल्ले खातीर थळाव्यांनी तिडक उक्तायली. कारवाय जायत नाशिल्ल्यान निरशेल्ल्या रहिवाशांनी मंगळारा पुलीस स्टेशनार धडक दिली.
आदित्य देसाय ह्या थळाव्यान दिल्ले म्हायती प्रमाण ज्येश्ठ नागरिकांचे सेवेची जापसालदारकी सोंपयिल्ले हे बायलेन तांच्या विस्वासाचो आनी असुरक्षीततायेचो गैरफायदो घेतलो. पिडितांक न्याय मेळोवन दिवपा खातीर पुलिसांनी तत्परतेन काम करूंक जाय.
मजगतीं, पुलीस अधिकाऱ्यांनी ह्या प्रकरणाची चवकशी सुरू केल्या आनी गरजेची ती कारवाय करतले अशें आस्वासन दिलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
