भांगरभूंय | प्रतिनिधी
मडगांव : आंतरराष्ट्रीय चित्रपट महोत्सवाच्या (इफ्फी) निमतान मनरिजवण सोसायटी ऑफ गोंयां वतीन जारी केल्ले पुस्तिकेवेल्या चित्रान जायत्या जाणांचें लक्ष ओडून घेतलें. ‘द पिकॉक’ हे पुस्तिकेच्या मुखपृश्टाचेर गोंयचे कलाकार सागर नायक मुळे हांणी हातांत दिवो घेतिल्ली बायल आनी तिच्या साडयेच्या उडपी पदराक लागून निर्माण जाल्लो मोराचो पिसारो भोव सुंदर दिसता. हें चित्र गोंयची संस्कृती आनी कलेचें दर्शन घडयता.
आंतरराष्ट्रीय चित्रपट महोत्सवाच्या काळांत एंटरटेनमेंट सोसायटी ऑफ गोवा हांचे वतीन चित्रपट महोत्सवांतली विवीध म्हायती ‘द पिकॉक’ हे पुस्तिकेंतल्यान दिता. अंदूं इफ्फी निमतान काडिल्ल्या ह्या पुस्तिकेच्या मुखपृश्टाचेर सागर नायक मुळे हांच्या चित्राक सुवात दिल्या. सागर हांचे कडल्यान कावी कलेचो सांबाळ आनी प्रसार जाता. सुमार सशें वर्सां आदली कावी कला खंय तरी सांडत वता आसतनाच नव्या कलाकारांनी हो भार आपल्या भुजांचेर उबारून ती तशीच तिगोवन दवरली. शेणत वचपी हे कलेचेर सागर नायक मुळे हांणी उजवाड घालो.
प्रधानमंत्री नरेंद्र मोदी हांणी ‘मन की बात’ कार्यावळींतल्यान हे कलेची तोखणाय जाले उपरांत ह्या कलेच्या प्रसारांत भर पडली. ‘द पिकॉका’ खातीर सागर हांणी काडिल्ल्या चित्रांत कावी कलेचो वापर केला. भित्ती चित्रांचो फॉर्म वापरून ताका इफ्फी २०२४ ची बॉर्डर काडल्या. खंयच्याय सुवाळ्याची, कार्यावळीची सुरवात दिवली पेटोवन जाता. हेच फाटभूंयेर एक बायल हातांत दिवो घेवन, साडी न्हेसून, केंसात फुलांची फाती माळ्ळ्या. तिचो उडपी पदर मोराच्या पिसार्या सारको दाखोवन त्या पदरार मोराचीं चित्रां काडल्यांत. तशेंच चित्रा सकयल आनी वयर वणटीवरीं दिसपी भाग दाखयला. इफ्फी पळोवपा खातीर आयिल्ल्या आनी नोंदणी केल्ल्या प्रतिनिधींच्या हातांत पडपी ही पुस्तिका गोंयच्या शेकड्यांनी वर्सां आदले कावी कलेच्या प्रसारांत मोलाची भुमिका करता. देशी परदेशी प्रतिनिधींकूय हो पिकॉक आवडटना दिसता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
