भांगरभूंय | प्रतिनिधी
हणखणेंच्या श्रीभराडी देवी उदका पुरवण वेवस्था संस्थेची शिटकावणी
कोरगांव, बातमीदार: हणखणे, तिळारीच्या मुखेल कानाला शेजारच्या रस्त्यार जड वाहनांतल्यान मालाची येरादारी केल्ले खातीर ह्या कानालाक धोको निर्माण जाला. ही येरादारी दोन दिसांनी बंद करूंक ना, जाल्यार आंदोलन करतले, अशी शिटकावणी हणखणेंच्या श्रीभराडी देवी उदका पुरवण वेवस्था सहकारी संस्थे वतीन दिल्या.
हणखणेंच्या श्रीभराडी देवी संस्थे वतीन धारगळच्या तिळारी जलसिंचन महामंडळाचे कार्यकारी अभियंत्यांक २९ ऑक्टोबराक लेखी निवेदन सादर करून हणखणें, तिळारीच्या मुखेल कानाला शेजारच्या रस्त्या वेल्यान जावपी जड वाहनांची येरादारी कायमची बंद करची. ती बंद करिना जाल्यार हो कानाल मोडून पडपाचो भंय उदका पुरवण समितीन उक्तायला.
मजगतीं, उदका पुरवण सहकारी संस्थेच्या पदाधिकार्यांनी तिळारी कानाला कडेन संबंदीत अधिकार्यांची परत भेट घेवन कानाला शेजारच्या रस्त्यावेल्यान येरादारी जाल्ल्यान कानालाचें नवें बांदकाम केल्लें कॉंक्रीट कोसळून पडपाच्या मार्गार आसा. येरादारीक लागून कानालाक जावपी धोक्या विशीं सविस्तर चर्चा केली.
कानाला शेजारच्या रस्त्या वेल्यान धंद्या विशींच्या मालाची येरादारी करपाक परवानगी दिवंक ना. तरी जड वाहनांची येरादारी कशी करतात? कारवाय कित्याक करपाक शकनात? अशे प्रस्न ह्या वेळार उपस्थितांनी केले. परवानगे बगर खाजगी कामां खातीर येरादारी करप हें तिळारी कडेन संबंदीत अधिकार्यांच्या आशीर्वादा बगर शक्य ना, असो ह्या वेळार आरोप केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
