भांगरभूंय | प्रतिनिधी
कांय जाणांक रातची बरी न्हीद लागना. न्हीद बरी घेतल्यार शारिरीक आनी मानसीक नदरेन मनीस निरोगी उरता. न्हीद उणी जाल्यार वा अर्दवट जाल्यार भलायकेचे जायते त्रास जावंक शकतात.
कांय जाणांक रातची बरी न्हीद येना, कारण तांचे मन शांत आसना. तांकां कसलो ना कसलो ताण आसता, तांचे तकलेन विचार चालू आसतात. हाका लागून तांकां जाग येता वा उसरां नेरेन न्हीद लागना. हाका लागून न्हिदेचें चक्र इबाडटा. रातच्या वेळार न्हिदतना तुमकांय नकारात्मक विचारांचो त्रास जाता जाल्यार न्हिदचें पयलीं कांय टिप्स पाळूं येतात. हाका लागून मन शांत उरतलें आनी न्हीद बरी लागतली.
१. इलॅक्ट्रॉनीक उपकरणां पसून पयस रावचें
हालीसराक सगळ्यां कडेन स्मार्टफोन आसा. हाका लागून रातचीं उसरां मेरेन सगळीं जागीं रावतात. ही संवय आसल्यार फोन पयस दवरल्या उपरांत लेगीत ताचो परिणाम न्हिदेचेर जावं येता. देखून मन शांत दवरपा खातीर न्हिदेच्या आदीं सुमार एक वर फोन, टीव्ही, लॅपटॉपा पसून पयस रावचें.
२. चितप ना
फाल्यांच्या कामाचो हुस्को आसल्यार आनी ताका लागून मन शांत उरना जाल्यार हें टाळपा खातीर नियोजीत पद्दतीन काम सुरू करात. म्हणल्यार घरांतल्या कामां पसून तें ऑफिसाच्या कामांची येवजण करात. अशें केल्यार ताचो हुस्को रातचो जावचो ना आनी न्हिद बरी लागतली.
३. योगा करप
बरी न्हीद घेवपा खातीर दर दिसा न्हिदेच्या आदीं योगा करूं येता. अशें केल्यार कुडीक आराम मेळटा आनी मानसीक नदरेनय एक तरेन बळिश्ट जाता. हाका लागून न्हिदेचो दर्जो सुदारता.
४. दूद
ताण आयिल्ल्यान रातच्या वेळार न्हिद लागना जाल्यार ताचे पसून सुटका मेळोवपा खातीर अर्द वर न्हिदेच्या आदीं दुदांत हळद वा मात्सो जायफळाचो पिठो घालून दूद पियेवचें. हे दोनूय मसाले ताण उणो करून न्हीद सुदारपाक मजत करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
