वेंचणुकेच्या नांवा खाला ‘धर्मझूज’?

भांगरभूंय | प्रतिनिधी

महाराष्ट्राचे तुळेंत भाजपा खातीर झारखंडाचो पेपर सोंपों वतलो अशींच चिन्नां दिसतात. महाराष्ट्रांत उणेच धडेर पास जावचे हे खातिरूच तांणी धर्मझुजाचो पर्याय आपणायिल्लो दिसता.

महाराष्ट्र आनी झारखंड ह्या दोन राज्यां कडेन सद्या देशांतल्या सगल्या लोकांचें लक्ष लागून आसा. फक्त चार ते पांच दिसां भितर ह्या दोनूय राज्यांचो राजकी फुडार थारतलो. विधानसभा वेंचणुकेच्या नांवा खाला ह्या दोनूय राज्यांत नेमके कितें चल्लां हें सांगप कठीण आसा. चड करून महाराष्ट्रा सारक्या प्रगत राज्यांत ‘व्होट जिहाद’, ‘व्होट धर्मझूज’ ह्या नांवांचीं लेबलां लावन प्रचार जावचो हें जाल्यार खुबूच दुर्दैवी आसा. पूण ‘सत्ते खातीर कितेंय’ हाचो प्रत्यय वेंचणूक प्रचाराच्या निमाण्या पांवड्यार खरपणान दिसून आयलो. कोणेय ‘व्होट जिहाद’चो नारो दीत जाल्यार कोणूय ताका हें तर ‘धर्मझूजच’ आशिल्ल्याचें सांगत एकप्रकारान धर्मझुजच आपणायलां. वेंचणुकेच्या नांवा खाला ‘धर्मझूज’ आपणावंक लागत जाल्यार फुडारांतल्या वेंचणुकांक हाचे परस वेगळें आनी गंभीर रूप मेळचें ना हें आयज कोणूय हड्डें बडोवन सांगूंक शकतले अशें दिसना, आनी हें सगलें टाळप हेंच आमच्या देशा खातीरचें हीत आसा. महाराष्ट्रांतली ह्या वेळा वेली विधानसभा वेंचणूक ही आतां मेरेन जाल्ल्या वेंचणुकांचे तुळेन वेगळी आसतली अशें सगल्यांकूच पयलीं दिसतालें. आनी बदलिल्ल्या राजकी समिकरणांक लागून तशें समजप कोणाचीच चूक लेगीत नाशिल्ली. आयज प्रत्यक्ष मतदान तोंडार येवन पाविल्लें आसतना मात ही वेंचणूक वेगळीच न्हय जाल्यार देशाक एक वेगळोच संदेश दिवंक शकतली अशें रूप तिणें धारण केलां. लोकसभा वेंचणुकेंत ‘व्होट जिहाद’ लादलो ह्या दाव्यांत कांय चुकीचें आसा अशें म्हणूंक येवचें ना, पूण ताचे आड ‘धर्मझूज’ ची भाशा उलयता आसत जाल्यार जें कितें चल्लां तें योग्य आसा अशें म्हणूंक येवचें ना.
महाराष्ट्रांतलो जाहीर प्रचार काल सोमारा सोंपलो आनी झारखंडांतूय दुसर्या टप्प्यांतलें मतदान हें फाल्यां बुधवारा जायत आशिल्ल्यान थंय लेगीत वेगळी परिस्थिती ना. महाराष्ट्र आनी झारखंड हीं दोनूय राज्यां व्हगडावन विरोधकांक जशें चलचें ना तशेंच भाजपप्रणीत राष्ट्रीय लोकशाय आघाडेकूय हीं राज्यां जिखून, विरोधकांनी आनी चड करून काँग्रेस पक्षान लोकसभा वेंचणुकेंतल्या निकालाच्या आदारान दिल्ल्या आव्हानाचो बुडबुडो फोडपाचो आसा. अशे परिस्थितींत वेंचणुको चुरशीच्यो जावप अपरिहार्य आशिल्लें. महाराष्ट्राचे तुळैन केंद्रांतल्या भाजपाक झारखंड राज्यांत तशे जोरकस आव्हान मेळटलें अशें सद्याची थंयची राजकी स्थिती पळयत जाल्यार दिसून येना. महाराष्ट्रांत मात भाजप आनी इश्ट पक्षांक आपली सत्ता राखपा खातीर खूबसो घाम गळोवचो पडटा आनी हे वेंचणुकेक ‘धर्मझूज’चें स्वरुप मेळपाचें तें लेगीत एक मुखेल कारण अशें म्हणूंक येतलें. काँग्रेस पक्ष आपल्या ‘तुश्टीकरण’ कार्डाचो वापर वा गैरवापर करतलो हे विशीं कोणाकूच दुबाव नाशिल्लो. लोकसभा वेंचणुकेंत हें ‘कार्ड’ अर्थांतच तांच्या कामाक आयलें आनी भाजपप्रमणीत आघाडीक ताची भरपाय महाराष्ट्रांत करपाची संद मेळ्ळी. सुरवातेक संयमान चालू आशिल्ल्या प्रचाराक निमाण्या पांवड्यार वेगळेंच मोडण मेळ्ळें आनी खूबशा जाणांक तें ‘धर्मझूज’ दिसूंक लागलां. महाराष्ट्रांतल्या वेंचणुकांक वक्फ बोर्ड कायद्याच्या विरोधांत केंद्रांत सत्ताधीश पक्षान घेतिल्ले भुमिकेचीय फाटभूंय आशिल्ल्यान ‘तुश्टीकरण’ कार्ड अदिकूच प्रभावी थारपाचो घात आशिल्लो आनी खूबशे फावटी तो प्रकटूय जालो.
जोड संसदीय समिती कडेन सद्या वक्फ बोर्डाचें प्रकरण विचारात आसून लेगीत समितीचे दरेक बसकेंतूय विरोधक जो खवदळ घालतात ताचें समर्थन करूंक येवचें ना. महाराष्ट्रांतले वेंचणुकेक अशीय फाटभूंय लाबिल्ल्यान प्रचाराक वेगळींवेगळीं मोडणां मेळत गेलीं आनी निमाणें व्होट जिहाद आनी धर्मझूज अशें स्वरूप ताका मेळत गेलें. अर्थांत हाका महाविकास आघाडीतले घटक पक्षूय तितलेच जापसालदार आशिल्ल्याचें अनुमान काडूंक येतलो. महाराष्ट्रांत वेंचणूक प्रचाराचो स्तर वा पांवडो इतलो घसरला की वेंचणूक आयोगाकूच हाची दखल घेवची पडटली. उबाठा शिवसेनेचे उद्धव ठाकरे हांचे तर राजकी अस्तित्वूच सोंपूं येता अशी वेळ तांचेर आयिल्ल्यान, सद्या बॅग तपासणी सावन बारीक सारीक गजाली वेल्यानूय ते सद्या ताळो ताणयत आड्डतना महाराष्ट्र पळयता. उद्धव ठाकरे हांचे खातीर ही वेंचणूक म्हणल्यार निश्चीतपणान अस्तित्वाचें झूज थारतलें. ते खातीर संजय राऊत हांचे सयत ते झूज झुजत आसात. एका विशिश्ट मर्यादे मेरेन शरद पवार हांचोय तांकां तेंको आसलो तरी ह्या दोगांच्या खांदार काँग्रेसीचें जें वजें पडलां ताचे खाला ते चेपून गेल्यात. हाचो राजकी लाव उठोवपाचो यत्न महायुतीचे फुडारी करीत आसा आनी तातूंत अर्थांतूच मुख्यमंत्री एकनाथ शिंदे, उपमुख्यमंत्री देवेंद्र फडणवीस हे आघाडीचेर आसात. आपली खेळणी चोरयेक गेले उपरांत वा कोणेय झोमून व्हेले उपरांत ल्हान भुरगीं जशीं रडटात तशेंच कितेंशें रडगाणे उद्धव ठाकरे आजून आपल्या बापायची छबी आनी पक्षाच्या चिन्ना वेल्यान गायतना आमी अजूनय पळयतात तेन्ना अशे वेंचणुके खातीर तांचे कडेन हेर मुद्देच नात हाचोय प्रत्यय येता.
महाराष्ट्रांतले लोक फाल्यां आपले 288 आमदार वेंचून काडपा खातीर मतदान करतले. भाजप आनी तांच्या इश्ट पक्षांनी सत्तेचो गड परतून जिखपा खातीर कसलीच कसर सोडिल्ली ना. ‘धर्मझूज’ हें अस्त्र जाल्यार निर्वाणीचें आशिल्लें. अल्पसंख्यांकांक कायम चुचकारून सुवार्थ सादपी काँग्रेस पक्षा खातीर हें अस्त्र अपेक्षीत नाशिल्लें, पूण सर्वसामान्य मतदारूय आयज खूबसो समंजस आशिल्ल्यान तांचे कडल्यान सत्ताधारी युतीक अपेक्षा आसात. काँग्रेस प्रदेशाध्यक्ष नाना पाटोळे आपले कार्ड खेळटना मुख्यमंत्रीपद आपले कडल्यान वच्चें ना मूं? हाची दक्षताय घेवन वेगळेंच कितें तरी करीत आसात. अशा वेळार महाराष्ट्रांत ह्या वेळार परतून कमळ फुलतलें? ह्या प्रस्ना बरोबरूच एकनाथ शिंदेंच्या धोनूंतल्यान बाण सुट्टलो काय उबाठांच्या ठाकरे हांची पालवल्ली मशाल पेट्टली हे सारके खूबशे प्रस्न विचारतात. शरद पवारांची तुतारी निश्चीतूच वाजतली अशें राजकी अभ्यासकांक दिसता. हाचें कारण जाण्टेपणांतूय आपले धुवे खातीर ते जे तडफडीन वावुरतात ते विशीं तांकां लोकांची आशिल्ली सहानुभुती. नाना पाटोळेंचो ‘हात’ कसली तोलामोलाची कामगिरी करून दाखयतलो वा अजीत पवारांच्या घडयाळीची ‘टिकटीक’ कितली मेरेन तिगतली अशेय प्रस्न आयज विचारतात. ह्या सगल्या प्रस्नांच्यो जापो मतदारूच दितले आनी शेनवारा एकदांच्यो मतपेटयो उलोवंक लागल्यो की ताची जाप रोखडीच मेळटली. झारखंडांतूय जेएमएमच्या धोनूंतल्यान परतून बाण सुट्टलो? हो लाखमोलाचाे प्रस्न आसलो तरी भाजपान ह्या वेळार तांकां पुरायपणान घेराव घाल्ल्याचें दिसून येता. काँग्रेसीची भाजपाक मजत जातली अशेंय सांगतात. महाराष्ट्राचे तुळेंत भाजपा खातीर झारखंडाचो पेपर सोंपों वतलो अशींच चिन्नां दिसतात. महाराष्ट्रांत उणेच धडेर पास जावचे हे खातिरूच तांणी धर्मझुजाचो पर्याय आपणायिल्लो दिसता.

वामन प्रभू
9823196359