भांगरभूंय | प्रतिनिधी
गुन्यांव फांट्याची कारवाय; चार दीस पुलीस कोठी
पणजी: आखांती देशांत वावरडेची नोकरी दिवपाचें हांयस दाखोवन बायलेची तस्करी आनी फटवणूक करपी रॅकेट गोंय पुलिसांच्या गुन्यांव फांट्यान उजवाडा हाडलें. ह्या प्रकरणांत गुन्यांव फांट्यान वास्कोचो सय्यद अब्दुल्ला शेख आनी मडगांवचो मस्तान खान उर्फ पठान ह्या दोगां दुबावितांक अटक केल्या. अटक केल्ल्या दोगां दुबावितांक वास्को पयलो वर्ग न्यायालयान चार दीस पुलीस कोठी दिल्या.
गुन्यांव फांट्याचे पुलीस अधिक्षक राहूल गुप्ता हांणी पत्रकार परिशद घेवन वयली म्हायती दिली. ते प्रमाण ह्या प्रकरणांत अर्ज ह्या बिगार सरकारी संस्थेचे संस्थापक अरुणेंद्र पांडे हांणी कागाळ दाखल केल्या. ते प्रमाण वयल्या दुबावितांनी विदेशी भरती एजंट आशिल्ल्याचें सांगून एके बायलेक मस्कतांत वावरेडीची नोकरी दिवपाचें हांयस दाखयलें. हे खातीर दर म्हयन्याक 30 हजार रुपया पगाराचें हांयस दाखयलें.
उपरांत 19 ऑक्टोबर दिसा तिका नोकरे खातीर मस्कतांत धाडून दिली. त्या वेळार तिचे कडेन वैजकी चांचणी आनी हेर खर्च म्हूण पांच हजार रुपया घेतिल्ले. थंय पावले उपरांत तिका एका फ्लॅटांत दवरली. थंय तिचे सयत हेर 11 भारतीय बायलां आशिल्लीं. उपरांत पिडीत बायलेक एका शेखाच्या घरा वावराडी म्हूण कामाक दवरली.
त्या घर धनयान तिचे कडेन लैंगीक मागणी केली. हाका विरोध केले उपरांत तिका वेवस्थीत जेवण दिनासतना तिचो छळ केलो. उपरांत वयल्या दुबावितांनी ते बायलेच्या घोवा कडेन संपर्क सादून ताचे कडल्यान 30 हजार रुपया घेतले उपरांत तिका परतून गोंयांत हाडिल्ल्याचें कागाळेंत नमूद केलां.
ह्या कागाळीची दाखल घेवन गुन्यांव फांट्यान गुन्यांव दाखल करून तपास सुरू केलो. ह्याच वेळार गुन्यांव फांट्याक दुबावितांची म्हायती मेळ्ळी. ते प्रमाण पुलीस अधिक्षक राहूल गुप्ता आनी उपअधिक्षक राजेश कुमार हांच्या मार्गदर्शना खाला निरिक्षक निनाद देवूळकार हांच्या फुडारपणा खाला उपनिरिक्षक जयराम कुंकळ्येंकार, हवालदार ईर्शाद वाटांगी, महाबळेश्वर सावंत, कॉन्स्टेबल विनायक सावंत, सुशांत पागी, कमलेश धारगळकार आनी कल्पेश तोरस्कार ह्या पंगडान आयतारा रातीं वास्को सय्यद अब्दुल्ला शेख आनी मडगांवां मस्तान खान उर्फ पठान ह्या दोगां दुबावितांक अटक केली.
अटक केल्ल्या दोगां दुबावितांक सोमारा वास्कोंतल्या पयलो वर्ग न्यायालयांत हजर करतकच न्यायालयान त्या दोगांकूय चार दीस पुलीस कोठी दिल्या.
गोंयांत केंद्रीय गृह मंत्रालयान मंजूर केल्ले 12 विदेशी भरती एजंट कार्यरत आसात. नागरिकांनी विदेशांत नोकरे खातीर वच्चे पयलीं संबंदीत एजंटांची चवकशी करची अशें आवाहन पुलीस अधिक्षक राहूल गुप्ता हांणी केल्या. तशेंच ह्या प्रकरणांतले पिडीत बायलेन दिल्ले म्हायती प्रमाण आनीक बायलांची तस्करी केल्ल्याचें दिसून आयलें. तांचे सुटके खातीर संबंदीत यंत्रणे कडेन फाटपुरवण करतले अशी म्हायती गुप्ता हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
