भांगरभूंय | प्रतिनिधी
भोपाळ, खबरां संस्था: आवय आनी दोगां भावांनी मेळून तिसर्या भावाचो खून करपाची घडणूक भोपाळांत घडल्या. घरांत चिकन करपाक लायिल्ल्यान बैरागढ वाठारांतल्या इंद्र नगरांत हो प्रकार जालो.
मरण आयिल्लो अंशुल यादव (२०) हो मुळचो शमशाबादचो. ताचो बापूय शिवराम गवंडो म्हणून काम करता. अंशुल हो ताची आवय अनिता , भाव अमन आनी कुलदीप हांचे सयत रावतालो. तिगूय भाव खाजगी नोकरी करतात. तांकां तिगांयकूय सोर्याचें वेसन आसा.
पुलिसांनी दिल्ले म्हायती प्रमाण, ९ नोव्हेंबराचे राती कडेन तिगूय भाव सोरो पियेल्ले. उपरांत अंशुलान घराच चिकन करपाचो आग्रो केलो. ताका आवय आनी भावान विरोध केलो. ताका लागून तांचे मदीं बरोच वाद जालो. झगड्याक नेट आयलो. अमन आनी कुलदीपान अंशुलाक दोरयेन गळो दामून मारलो.
पुलिसांनी सांगलें, कुटुंबीयांनी अंशुलाक एका हॉस्पिटलांत व्हेलो आनी तो न्हिदेंतूच बेशुद्ध पडिल्ल्याचो दावो केलो. मजगतीं, दोतोरांनी ताका मरण आयिल्ल्याचें सांगलें. ह्या अकस्मात आयिल्ल्या मरणाची नोंद दोतोरांनी पुलिसां कडेन केली. पुलिसांनी हे विशीं चवकशी केली. अंशुलाक सैमीक मरण आयिल्ल्याचें दाखोवपाचो यत्न कुटुंबियांनी केलो. मात पोस्टमार्टम रिपोर्टांत दोरयेन गळो आवळून मारिल्ल्याचें स्पश्ट जालें. ह्या पुराव्याच्या आदारान पुलिसांनी दुबावितांची खर चवकशी केली. निमाणें आवय आनी पुतांनी आरोपाची कबुली दिली. वादांतल्यान जीव घेवपी हल्लो कसो जालो हेंय तांणी पुलिसांक सांगलें. पुलिसांनी अनिता यादव, अमन यादव आनी कुलदीप यादव हांकां अटक केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
