भांगरभूंय | प्रतिनिधी
पणजी : गोंयचो सोरो सवाय आनी सहज उपलब्ध आशिल्ल्यान जायते फावट ताची वायट मार्गान तस्करी जातना पळोवपाक मेळटा. कर्नाटकच्या मंगळुरू- दक्षीण कन्नड भागांतल्यान वायट मार्गान सोर्याची तस्करी आनी सांठोवपाचें प्रकरण मुखार आयलां.
मेळिल्ले म्हायती प्रमाण, अबकारी विभागान मंगळूरुच्या दक्षीण कन्नड भागांतल्या कंबाला क्रॉस – कोडियाबैल हांगा अबकारी खात्यान छापो घातिल्लो. ह्या वेळार अधिकार्यांनी १९.५ लिटर्स मिलिटरी स्टँडर्स सोरो, ५२.५ लिटर्सची गोंयचो सोरो, ३ लिटर्स कर्नाटकांत तयार जाल्लो सोरो तशेंच सुमार ३ लिटर्स फॉरेन ड्यूटी-फ्री सोरो तशेंच, २१.५ लिटर्स गोंयांत तयार केल्ल्यो बियरी, ०.३ लिटर्स कर्नाटकाच्यो बियरी १.३ लिटर्स मिलिटरी स्टँडर्ड बियर असो सोर्याचो सांठो जप्त केलो.
विशेश म्हळ्यार ह्या छाप्यांत जप्त केल्ल्या सोर्याचीं आनी बियरीचीं प्रमाणीत कागदपत्रां ना. मुखार आयिल्ले म्हायती प्रमाण ह्या मालाची किंमत सुमार १.६४ लाख रुपया आसा. हे कारवाये मजगतीं दुबावीत अमित ए पी फरारी जाला. अधिकारी ताचो सोद घेतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
