भांगरभूंय | प्रतिनिधी
उडुपी, खबरां संस्था : कर्नाटकांत फाटल्या कांय काळा सावन गोंयांत तयार केल्ल्या सोर्याची तस्करी आनी सांठवण करपाचेर प्रशासनाची बारीक नदर आसा. गोंयचे शिमे वयल्या चेकपोस्टांचेर सदांच खर तपासणी करतात, मात कांय धाडसी लोकांनी हाचेरूय तोडगो काडला. हातुंतल्यान वेगवेगळ्या मार्गांनी गोंयांतल्यान कर्नाटकांत सोरो व्हरता हें उजवाडाक आयलां.
मजगतीं, उडुपी अबकारी खात्यान आयतारा करकला तालुक्यांतल्या बोला गांवांतल्या थळाव्या काँग्रेस फुडारी अविनाश मल्ली हांच्या दोन घरांतल्यान १५ लाख रुपया मोलाचो गोंयांत तयार केल्लो २३६०.८५ लिटर सोरो जप्त केला.
मंगळुरु अबकारी खात्याचे सहआयुक्त एचसी बालकृष्ण हांच्या निर्देशा प्रमाण विभागाच्या अधिकार्यांनी मल्ली हांच्या मारीमारू गुथू आनी अवनी निलया हांगच्या दोनूय घरांचेर बिरेस्तारा फांतोडेर ४:५० वरांचेर छापो घातलो. छाप्या मजगतीं मल्ली आनी दुसरो आरोपी प्रशांत सुवर्णा (उडुपी) हे फरारी जाले, अशें विभागाच्या अधिकार्यांनी सांगलें.
एकदांच घाल्ल्या छाप्यांत विभागाच्या अधिकार्यांक गोंयच्या सोर्याचीं वट्ट २७२ बॉक्सां सापडलीं. हे विशीं गुन्यांव नोंद केला. मुखार आयिल्ले म्हायती प्रमाण मल्ली हे २०००-०२ मजगतीं बोलाचे सरपंच आशिल्ले. सध्या ते बोला ग्रामीण काँग्रेस समितीचे अध्यक्ष आसात.
विभागाच्या अधिकार्यांनी केल्ल्या दाव्यां प्रमाण, मल्ली आनी सुवर्णा हे शेजारच्या केरळांत लग्न सुवाळे आनी हेर पार्ट्यां खातीर गोंयच्या सोर्याची पुरवण करताले. अबकारी खातें तशेंच पुलिसांक फटोवपा खातीर हे दोगूय व्हडल्यो गाडयो वापरून सोर्याची येरादारी करताले. भाजीपाल्याची येरादारी करपी लॉरींतल्यान गोंयच्यान सोरो हाडटाले, अशें अधिकार्यांनी सांगलें. हे विशीं पुरावे हातांत आयले उपरांत अबकारी खात्याच्या अधिकार्यांनी धाड घाली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
