भांगरभूंय | प्रतिनिधी
पणजी : एस्कॉर्ट वेबसायट तयार केले उपरांत शिंदळकी वेवसाय करून गोंयची बदनामी करपी दोगांक गोंय पुलिसांच्या सायबर विभाग तशेंच गुन्यांव फांट्यान आंध्रप्रदेशांत वचून अटक केल्ली. हेच फाटभूंयेर गोंय पुलीस सेगीत हे विशीं तपास करताले. मजगतीं उत्तर प्रदेशांतल्या गाजियाबाद मेरेन ह्या प्रकरण पातळिल्ल्याचें समजतांच गोंय पुलिसांच्या गुन्यांव फाट्यान कारवाय करून एस्कॉर्ट वेबसायटी वरवीं गोंयांत शिंदळकी वेवसाय चलोवपी योगेश कुमार (४१) ह्या तिसर्या दुबाविताक अटक केली.
मेळिल्ले म्हायती प्रमाण दुबावीत deepikaverma.com नांवाची वेबसायट चलयतालो. योगेशान स्वता ही वेबसायट तयार केल्या. ताणें दाखयल्ले सुवातेर गोंय पुलिसांनी वेबसायटीचो सगळो डेटा जप्त केलो आनी ताचे कडल्यान जायतें इलॅक्ट्रॉनीक सामानूय जप्त केलें. ताका ताब्यांत घेवन गोंयांत हाडून अटक केली.
मजगतीं, गोंय पुलीस गुन्यांव फांट्यान एस्कॉर्ट वेबसायटी वरवीं शिंदळकी वेवसाय चलोवपाच्या प्रकरणांत आरोपी सय्यद सुलतान उस्मान (५४, रा. चित्तोर आंध्रप्रदेश) आनी मोहम्मद सलामतुल्लाह मोहेबुल्ला (३०, रा. गुरगाव हरियाणा) हांकां अटक केल्या. हे दोगूय उल्लेख केल्ली वेबसायट चलयताले आनी दलाली करताले. मजगतीं, उजवाडाक आयिल्ले म्हायती प्रमाण गोंय पुलीस गुन्यांव फांट्यान आनी सायबर गुन्यांव खात्यान आतां मेरेन ७८ वेबसायटी ब्लॉक केल्यात. तेच प्रमाण ह्यो वेबसायटी चलोवप्यांची वळख पटोवपाचीं काम पुलीस करतात.
२५ ऑक्टोबराक ह्या दुबावितां आड पुलिसांनी म्हायती आनी तंत्रज्ञान कायदो कलम ६७,६७ अ, बायलां अश्लील प्रतिनिधीत्व कायदो कलम ६ आनी शिंदळकी वेवसाय प्रतिबंधक कायदो कलम ४ आनी ५ खाला गुन्यांव नोंद केल्लो. हे विशीं तपासणी करतना गुन्यांव फांट्याक ही वेबसायट आंध्र प्रदेशांतल्या मदनापल्ले हांगच्यान नियंत्रीत केल्ल्याची म्हायती मेळ्ळी. ते प्रमाण गोंय पुलीस गुन्यांव फांट्यान हांगच्या पुलिसांच्या आदारान दुबावीत आरोपीक अटक केली. अधीक्षक (गुन्यांव) राहुल गुप्ता आनी उपअधीक्षक राजेश कुमार हांच्या मार्गदर्शना खाला आनी पुलीस निरिक्षक दत्तराम राऊत हांच्या फुडारपणा खाला पुलीस पंगड ह्या प्रकरणाची चवकशी करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
