भांगरभूंय | प्रतिनिधी
पणजी : सेंट फ्रान्सिस झेवियर हांच्या १७व्या पवित्र कूड दर्शन सुवाळ्याक २१ नोव्हेंबराक सुरवात जाता. हे फाटभूंयेर सरकार, पुलीस यंत्रणां, आयोजन समिती आनी प्रत्यक्ष कामांत गुथिल्ल्या कामगारांचीं कामां थारायिल्ल्या वेळार पुराय करपाची हालचाल हांगा पळोवपाक मेळटा. हांगचीं जायतीं कामां पुराय जाल्यांत. मात उरिल्लीं कांय कामां येवपी दोन दिसांनी पुराय जातलीं.
मजगतीं, इगर्जेच्या वाठारांत सुमार २०० भक्तांक तात्पुरतो माटोव बांदपाचें काम सध्या सुरू आसा. तशेंच लागसारच्या पार्किंग सुवातेर आनी आर्क ऑफ कॉन्सेप्शन लागसार तात्पुरतें शौचालय उबारपाचें काम सुरू आसा. तेच प्रमाण बॅसिलिका फाटल्यान आशिल्ल्या सुविधांचेंय काम चालू आसा. हो वाठार पाद्री आनी धर्मीक कार्यावळींनी वांटेकार जावपी व्यक्तींचीं वाहनां पार्कींग करपा खातीर वापरतले. तशेंच ह्याच वाठारांत यात्रेकारां खातीर रावपाची वेवस्था करतले.
मजगतीं, बॅसिलिका लागसार उबारिल्ल्या पांडलाचें काम पुराय जायत आयलां. पवित्र कुडीचें दर्शन करपाक येवपी भक्तां खातीरय हांगा सुविधायो उबारतले. जर्मन हँगरूय उबारला. भक्तांचो आंकडो जर अपेक्षे परस चड जाल्यार तांकां हांगा रावपाची वेवस्था करतले. सेंट जॉन ऑफ गॉड कॉन्व्हेंटाकूय रंग मारून नुसतनीकरण केलां.
मजगतीं, सेंट जॉन ऑफ गॉड कॉन्व्हेंट अंदूं सेंट फ्रान्सिस झेवियर चे जिणेचेर आदारीत ’फुटप्रिंट्स ऑफ होप’ ह्या प्रदर्शनाचें आयोजन करतले. ह्या प्रदर्शनांत गोंयचे सुमार ६२ कलाकार आपली कला दाखयतले. हाचे वरवीं सेंट फ्रान्सिस झेवियर हांची जिवीत कथा भक्तां मुखार आनी पर्यटकां मुखार उक्ती जातली. हांगा आयोजक समिती खातीर वेगळ्या विभागाची वेवस्था केल्या. हें प्रदर्शन सुरळीत चलचे खातीर आयोजन समितीचे वांगडी हांगाच चर्चा, विचार मांडटले.
एकंदर वेवस्था
-यात्रेकारांक रावपाची वेवस्था सेंट जोसेफ वाझ रीन्युअल सेंटर, पेस्टॉरल इंस्टीट्यूट, से कॅथेड्रल हांगा करतले. तशेंच, पिलग्रिम व्हिलेज उबारला. हातूंत २०० लोकांक रावपाची वेवस्था करतले. ज्या भाविकांनी पयलींच बुकींग करूंक ना, तांचे खातीर शासकीय रावपाची वेवस्था आसा. आनी हांगा उण्यात उण्या खर्चान जेवणूय दितले.
-सदे भशेन पार्किंगची सुवात भाकिया प्रॉपर्टीचेर आसतली. मात अंदूं दिव्यांग, दुयेंत लोकां खातीर पार्किंगची वेवस्था केल्या. बॅसिलिकाच्या फाटल्यानूच पाद्री, स्वयंसेवक, कॉयर (गायक) वांगडी, धर्मीक विधींत वांटेकार जावपी आनी वाचन करतल्यां खातीर आसतली. ती सुवात सामान्यां खातीर आसची ना. तशेंच सांता मोनिका कॉन्व्हेंट हांगचे इगर्जेच्या वाठारांत सध्या पार्कींग वाठार तयार करतात.
-बायो टॉयलेट उबारप म्हारग पडिल्ल्यान हांगा तात्पुरत्या टॉयलेट उबारल्यात. भारतीय पुरातत्व विभागाच्या मान्यताये प्रमाण थारिल्ले सुवातेर हे शौचालय उबारतले. हो सुवाळो सोंपले उपरांत ते काडटले.
-व्हेनेरेशना खातीर अंदूं बुकींग स्लॉट्स उपलब्ध करतले अशी भाविकां मदीं चर्चा आशिल्ली. मजगतीं हाचेर आयोजन समितीचे वांगडी फादर फाल्काओ ’पवित्र कुडीचें दर्शन रांगेंत रावूनच घेतात, अशी श्रद्धा आसा. हे खातीर खंयचेच बुकींग स्लॉट्स ना’ अशें तांणी म्हणलां. हाका लागून लोकांनी रांगेंतूच रावचें. मात जांकां चलपाक वा उबे रावपाक त्रास जातात अश्या ज्येश्ठ भाविकां खातीर विशेश सुविधायूय उपलब्ध करून दितले अशें तांणी म्हणलें.
-ज्या भाविकांक पोरण्या गोंयचे इगर्जेची म्हायती जाणून घेवपाची आसा तांणी कॅथोलीक कनेक्ट ऍप डावनलोड करचो. हो ऍप कॉन्फरन्स ऑफ कॅथॉलीक बिशप ऑफ इंडिया (उउइख) प्रमाणीत आशिल्ल्यान हाचेर तुमकां ऑडियो टूर मेळटलो. हातूंत इगर्जेची म्हायती आनी हेर गजाली तुमी जाणून घेवपाक शकतात.
मजगतीं, सेंट फ्रान्सिस झेवियरच्या प्रदर्शन सुवाळ्याक हांगचे पंचायतीची भुमिका फकत स्टॉल वाटपा इतलीच मर्यादीत आशिल्ल्याची म्हायती सरपंच मेधा पर्वतकार हांणी दिली. हांगा पंचायती वतीन वट्ट ६०० स्टॉल्स वाटल्यात. दर वर्सा सुमार ६५० स्टॉल्स उबारतात. मात सुरक्षा वेवस्था, ऍम्बुलन्स तशेंच उजो पालोवपी दळाक येवपा-वचपा खातीर गांधी सर्कला लागसारा सुवात मेकळी दवरल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
