भांगरभूंय | प्रतिनिधी
पणजीः गोंयांत फाटल्या 10 वर्सांत आयकराच्या रुपान भरिल्ले रकमेंत 1047 कोटी रुपयांची वाड जाल्या. अर्थीक वर्स 2014- 15 त गोंयांतल्यान 2820 कोटी रुपया आयकर जमा जाल्लो. 2023- 24 त तो वाडून 3867 कोटी रुपया जाला. हो 10 वर्सांतलो गोंयांतल्यान जमा जाल्लो सगळ्यांत चड आयकर आसा. केंद्रीय वित्त खातें तशेंच आयकर विभागान जारी केल्ल्या विवीध अहवालांतल्यान ही म्हायती मेळ्ळ्या.
वयल्या काळांत तीन अर्थीक वर्स सोडल्यार गोंयांतल्यान जमा जावरी आयकराची रकम दर वर्सा वाडत गेल्या. 2014- 15 चे तुळेंत 2015- 16 त आयकर संकलन सुमार 1220 कोटी रुपयांनी उणें जावन 16—कोटी रुपया जाल्लें. जाल्यार 2017- 18 चे तुळेंत 2018- 19 त आयकर संकलन सुमार 42 कोटी रुपयांनी उणें जावन 2459 कोटी रुपया जाल्लें. कोरोना काळांतलें आयकर संकलन लेगीत उणें आशिल्लें. 2019- 20 त गोंयांतल्यान 2170 कोटी रुपया आयकर जामा जाल्लो.
तशेंच गोंयांतल्यान अर्थीक वर्स 2016- 17 त 2248 कोटी रुपया, 2020- 21 त 2655 कोटी रुपया, 2021- 22 त 2879 कोटी रुपया जाल्यार 2022- 23 त 3379 कोटी रुपया आयकर जमा जाला.
गोंय ल्हान राज्य आशिल्ल्यान हेर व्हड राज्यांचे तुळेंत गोंयांतल्यान भरतात त्या आयकराची रकम उणी आसा. अशें आसलें तरीय लोकसंख्येचो विचार केलो जाल्यार दर व्यक्ती आयकर भरपाक गोंयकार देशांत मुखार आसतात. केंद्रीय वित्त खात्याचे आंकडेवारी प्रमाण 2022- 23 त लोकसंख्येचे तुळेंत गोंयांतल्या 15.8 टक्के लोकांनी आयकर भरिल्लो.
पुराय देशांतल्यान आयकर 19.61 लाख कोटी
अहवाला प्रमाण 2023- 24 त पुराय देशांतल्यान आयकराच्या माध्यमांतल्यान 19.61 लाख कोटी रुपया जमा जाल्ले. 2014- 15 त पुराय देशांतल्यान 6.95 लाख कोटी रुपया आयकराचें संकलन जाल्लें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
