भांगरभूंय | प्रतिनिधी
म्हापशें, प्रतिनिधी ः भाजपाचे कांय कार्यकर्ते आतां नोकरी आनी हेर कांय गुन्यांवकारी गजालींचे एजंट जाल्यात. पक्षांतर केल्ले लोक प्रतिनिधीय ह्या घोटाळ्यांतल्यान पयशे जोडटात, असो गंभीर आरोप काँग्रेसीचे सरचिटणीस विजय भिके हांणी केलो. शेनवारा 16 तारखेक म्हापशेंच्या पक्ष कार्यालयांत जाल्ले पत्रकार परिशदेंत ते उलयताले. ह्या वेळार नगरसेवक सुधीर कांदोळकार, नगरसेवक अॅड. शशांक नार्वेकार आनी परेश पानकर हाजीर आशिल्ले.
मतदारांक नोकरी दिवपाचें उतर दिवन मतांची भीक मागून भाजपान सत्ता जिखली. आयज सरकारी नोकरी दिवपा खातीर पयशे घेवपाक लागल्यात. गोंयचे आदले राज्यपाल सत्यपाल मलिक हांणीय गोंय सरकारांत भ्रश्टाचार जाता असो जाहीर आरोप केल्लो. ‘किसी को खाने नहीं दूंगा’ असो दावो करपी भाजपा गोंयांत फाटलीं 12 वर्सां सगळ्या वटांनी लुटमार करता असोय आरोप भिके हांणी केलो.
पयशे घेवन नोकरी दिवपाचे भानगडींत मंत्री ते भाजपा कार्यकर्ते मेरेन सगले आसात. तपास एजन्सींनी ताची पुराय चवकशी करची. सत्यपाल मलिक हांचे कडल्यान म्हायती घेवन केंद्रीय तपास एजन्सीन गुन्यांवकारां मेरेन पावपाक जाय. पुलीस महासंचालक आनी उपमहानिरीक्षकान ह्या नोकरी भानगडीचो चवकशी अहवाल दर दिसा लोकां मुखार दवरचो, अशी मागणी भिके हांणी केल्या.
भाजपाची सत्ता आशिल्ल्या म्हापशें पालिकेंतूय भरती घोटाळो सुरू आसा. थारावाची कार्यवाही मान्य जावचे पयलीं नगराध्यक्ष आनी मुखेल कार्यकारी मंडळान बेकायदेशीर रितीन स जाणांची कंत्राटी तत्वाचेर नेमणूक केल्या. एका दशका परस चड काळ भाजपा म्हापशें पालिकेचेर राज्य करता. ह्या डबल इंजिन सरकारान पालिकेंत रितीं आशिल्लीं 67 पदां कायदेशीर रितीन भरपा खातीर कसलोच यत्न केल्लो ना. हीं पदां परतून जिवीत करपाची गरज आशिल्ली. पूण कायदेशीर प्रक्रिया पुराय करचे पयलीं तांणी भरतीचो प्रचार केलो आनी आपल्या आवडीच्या, अकार्यक्षम उमेदवारांक घेतलें असो आरोप नगरसेवक अॅड. शशांक नार्वेकार हांणी केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
