शिंयाळो भलायकेक बरो

भांगरभूंय | प्रतिनिधी

शिंयाळो वातदोश वाडयता. ह्या दिसांनी घाम येवप बरें. भुकय बरी लागता. पचनशक्त बरी उरता. कितेंय खा, पचता. पुश्टीक जिनस खावप बरें.

शिंयाळो म्हणल्यार थंडेच्या रुतूचें आगमन जालां. तो सगल्यांच्या मोगाचो रुतू. सध्या गोंयांत शारांनी मात्शी मात्शी थंडी पडपाक सुरवात जाल्या. गांवांनी मात शीं पडटा. पावस नासल्यार सांज जाली काय शीं पडपाक लागता. वातावरणांत थंडसाण पातळटा. वारो आसल्यार आंग शिरशिरता. 

फांतोडेर अचकीत जाग येता. जनेलांतल्यान गार वाऱ्याचें ल्हार घरांत घुसता तेन्ना आळशांक गोजडी घेवन आनीक न्हिदनशें दिसता, तर थोड्याक भायर वचून नितळ हवेंत वचून व्यायाम करचोसो दिसता.

शिंयाच्या दिसांनी सकाळीं वातावरणांत शांतीकाय आसता. ना कोणाची गडबड ना गोंदळ. सकाळीं चलप, धांवप सामकें बरें. येरादारीय कमी आसता. सुकणीं, गोरवां सोडून सगलो सैमूच न्हिदिल्लो आसता. हें पळयतल्याच्या मनाक समाधान मेळटा. धांवतना उमेद येता. उर्जा वाडटा. सकाळच्या व्यायामाक लागून आमची कूड निरोगी उरता. थंड हवेचो आस्वाद घेतल्यार ताजें- तवाने दिसता. घरा येतकच मागीर च्यायेचो गरमागरम घोंट मेळप म्हणल्यार सर्गसुखच. शिंयाळो वातदोश वाडयता. ह्या दिसांनी घाम येवप बरें. भुकय बरी लागता. पचनशक्त बरी उरता. कितेंय खा, पचता. पुश्टीक जिनस खावप बरें. मास, नुस्तें, भिकणां, सुको मेवो, मसाले, ताजीं हळडुवीं फळां, मोसंबी, संत्रां, हातेरां, ताज्यो पालेभाजयो, मेथी, मुळो, पालक खावप बरें. तातूंत चड क्लोरोफील आसता. शीत, उडीद, दाळीचे पोळे, इडली, आंवाळो- लिंबाचें लोणचें, कुंवाळो, बीट, गाजराचो सूप एकदम बरो. दूद घालून केल्ल्यो शेंवयो, रवो, खीर सामकीच री. कारांदे, काटे कणगां उकडून खावचीं.

थंडेच्या दिसांनी सकाळीं गरमागरम च्या, चपाती खाल्ल्यान पोटाक दनपार मेरेन थाकाय मेळटा. कामुय बरें जाता. दनपारचो हलको- फुलको आहार. रातच्या वेळार गरमागरम जेवण जेवून रोखडेंच न्हिदचें न्हय. आंगणांत, गॅलरींत, तेर्रेसाचेर  पासय मारप जिवाक बरें. न्हिदूय बरी पडटा. 

शिंयाचे दीस एकदम बरे. सदांच व्यायाम करचो. फक्त जिमाक म्हारग फी दिवन वच्चे परस माॅर्निंग वाॅक करप. दिसाक दोन किलोमिटर तरी चलपाक जाय. जाॅगिंग करपाक जाय. रोगप्रतिकार शक्त वाडटा. आपले कुडीची, कातीची, ओठांची काळजी घेयात. 

सिद्धी तिळवे